کندهار کې د ۳۵ شنو خونو د جوړېدو چارې ۵۰ سلنه بشپړې شوې دي

۶ غویی ۱۴۰۴ ه‍.ش
۲۸ شَوّالُ المُکَرَّم ۱۴۴۶ه‍.ق
د کرنې، اوبو لګولو او مالدارۍ وزارت د بدیل معیشت «کوکنارو بدیل» پراختیايي پروګرام له لارې، د کندهار ولایت د کرنې ریاست په مشرتابه او د یوه خصوصي ودانیز شرکت په تخنیکي همکارۍ، د طبیعي سرچینو او کرنیزو چارو آمریت تر مستقیمې څارنې لاندې، د ۶.۴ میلیونه افغانیو په ارزښت د ۳۵ شنو خونو د جوړولو چارې پیل شوې دي، چې تر دې دمه ۵۰ سلنه بشپړې شوې دي.
یادې شنې خونې د کندهار د شپږو ولسوالیو اړمنو بزګرانو ته ځانګړې شوې دي، څو د کوکنارو د بدیل په توګه د پایدارو کرنیزو تولیداتو زمینه برابره شي.
د شنو خونو د چارو د معیاري تطبیق او پرمختګ په موخه، د طبیعي سرچینو آمریت انجنیر نورمحمد همکار او د کرنیزو چارو آمریت انجنیر ایمل حکیمي د پروژې څارنه کړې. د څارنې پر مهال د شنو خونو د کیفیت، ودانیزو چارو او پرمختګ څرنګوالي هراړخیزه ارزونه شوې او د کیفیت د لوړولو په موخه اړینې تخنیکي سپارښتنې وړاندې شوې دي.
د کندهار د کرنې ریاست مسؤلین وايي، چې دوی د هرې کرنیزې پراختیايي پروژې د مؤثر تطبیق لپاره پر وخت او معیاري څارنه کوي، څو بزګرانو ته د بدیل معیشت زمینه برابره او د هغوی ستونزې په مؤثر ډول حل شي.