ننګرهار کې د ۲۰۰زره ډوزه طاعون واکسین د تطبیق لړۍ وڅارل شوه
۱۸ وری ۱۴۰۴ ه.ش
۹ شَوّالُ المُکَرَّم ۱۴۴۶ه.ق
د ننګرهار د کرنې، اوبولګولو او مالدارۍ ریاست د مالدارۍ خدمتونو او د څارویو روغتیا امریت کارکوونکو له خوا د اچین او سپین غر ولسوالیو په اړوندو سیمو کې د وړو شخوند وهونکو څارویو لپاره د طاعون واکسین د تطبیق چارو څارنه ترسره شوه.
د څارنې پر مهال نه یوازې د واکسین تطبیق ارزول شو، بلکې مالدارانو ته د واکسین ارزښت، د څارویو له ناروغیو د مخنیوي اهمیت او د مالدارۍ سکتور د پیاوړتیا په اړه تفصیلي معلومات هم ورکړل شول. همداراز، وتـرنر ډاکترانو ته د سوړ زنځیر د ساتنې، واکسین د سم تطبیق او معیارونو مراعتولو په اړه سپارښتنې وشوې.
په ننګرهار ولایت کې سږ کال شاوخوا ۲۰۰زره وړو شخوند وهونکو څارویو ته د طاعون واکسین د تطبیق بهیر روان دی، چې موخه یې د څارویو د وژونکې ناروغۍ مخنیوی او د مالدارۍ سکتور پیاوړتیا بلل کېږي.
د یادونې وړ ده چې د کرنې ریاست د عامه پوهاوي ترڅنګ د څارویو د روغتیا د خوندیتوب لپاره بېلابېل واکسینونه تطبیقوي، څو له مالدارۍ عملي ملاتړ وشي.
