د کندهار په پنجوايي ولسوالۍ کې د ځنګلي بوټو د پرېکولو مخنیوي په موخه څارنه وشوه
۱۸ وری ۱۴۰۴ ه.ش
۹ شَوّالُ المُکَرَّم ۱۴۴۶ه.ق
د کندهار ولایت د کرنې، اوبولګولو او مالدارۍ ریاست له خوا د پنجوايي ولسوالۍ په بېلابېلو سیمو کې د ځنګلي بوټو د پرېکولو، ساتنې او عامه پوهاوي په موخه څارنه ترسره شوه.
یاده څارنه د کرنې او مالدارۍ مدیرانو او د ځنګلونو او څړځایونو د تنظیم مسؤل مولوي نعمت الله په مشرۍ ترسره شوه، چې په ترڅ کې یې د سیمې اوسېدونکو او مالدارانو ته د طبیعي شتمنیو ارزښت، د ځنګلونو د پرېکولو زیانونه او د ساتنې اهمیت په اړه پوهاوی ورکړل شو.
د مسؤلینو په وینا، دا ډول څارنې د دې لپاره ترسره کېږي چې خلک د طبیعي سرچینو ارزښت درک کړي او د ساتنې په برخه کې یې فعاله ونډه واخلي. هغوی ټینګار وکړ، چې د طبیعي شتمنیو د تخریب په وړاندې به هېڅ ډول ناقانونه فعالیت ته اجازه ورنه کړي او هڅې به لا زیاتې کړي.
د یادونې وړ ده، چې یوه ورځ وړاندې هم د سپین بولدک ولسوالۍ په پنځمه ناحیه کې د نیمه ځنګلي، طبیعي او ریګي بوټو د ناقانونه انتقال د مخنیوي او پوهاوي په موخه څارنه ترسره شوې وه، چې په ترڅ کې یې د ناقانونه انتقال هڅه ناکامه شوې وه.
