د کندهار ارغنداب ولسوالی کې پر سلګونو اړمنو کورنیو د لبنیاتو او تازه محصولاتو پروسس توکي ووېشل شول
د کندهار د کرنې، اوبو لګولو او مالدارۍ ریاست په هڅو، د اسلامي هوساینې (اسلامیک ریلیف) ادارې په همکارۍ ، د یوې روڼې او شفافې پروسې له لارې د کندهار د ارغنداب په ولسوالی کې ۲۰۰ بیوزلو کورنیو ته د لبنیاتو او تازه محصولاتو د پروسس اړین توکي ووېشل شول.
په دغو وېشل شویو توکو کې ۱۴ قلمه اړین توکي شامل وو، چې هرې کورنۍ ته د ګاز ډبه، بخاري، شلومبو غړکه، پنځه فلزي دیګونه، د تازه مېوو جوسر، د شېدو دوه لوښې، دشېدو فلټر، د سبو د مینځلو لوښې، چړې، د سبو پرې کولو تخته، دوه کفګیرونه، قاشوقې او درې متره ټوکر ورکړل شوي دي.
د دې مرستې موخه د اړمنو کورنیو اقتصادي وضعیت ښه کول، د لبنیاتو او سبو د پروسس له لارې د هغوی د عایداتو زیاتوالی، د خوراکي توکو د ضایع کېدو مخنیوی او د بزګرانو او مالدارانو اقتصاد ته وده ورکول دي.
د یادونې وړ ده، چې په نږدې راتلونکو ورځو کې به د کندهار د کرنې ریاست په هڅو او د اسلامي هوساینې ادارې په همکارۍ، د ارغستان ولسوالۍ ۴۰۰ اړمنو کورنیو ته هم ورته مرستې ووېشل شي.
