هرات او نورستان ولايت کې د ځمکو د تثبيت چارې بشپړې شوې
۸ سلواغه ۱۴۰۳ه.ش
۲۷ رَجَب المُرَجَّب ۱۴۴۶ه.ق
د عالیقدر امیرالمؤمنین (حفظه الله تعالی) د حکم په اساس صنعت او سوداګرۍ وزارت لپاره د هېواد په کچه په هر ولايت کې د زر جريبه ځمکې د تثبيت او انتقال په پار د صنعتي پارکونو د جوړولو په موخه هرات او نورستان ولايتونو کې هم د ځمکو تثبيت چارې بشپړې شوې.
په دغه پروګرام کې، چی د کرنې وزارت د اراضۍ لوی رياست لخوا په لاره اچول شوی په داسې حال کې چې د اراضۍ ادارې او د دغه ولايتونو د مختلفو ریاستونو چارواکو شتون درلود د يادو ځمکو د تثبيت اسنادونه په رسمي بڼه په يادو ولايتونو کې لاسلیک شول چې دغه سندونه به د نورو اجراآتو په موخه مرکز ته واستول شي.
په پای کې د دواړو ولايتونو مسؤلينو په جلا جلا توګه د خپلو ولايتونو ددغه کار د پایلې څخه خوښي څرګنده کړه او دا کار يې د افغانستان اسلامي امارت د مشرتابه د حکم د تطبيق او همدارنګه د هېواد د پرمختګ او سوکالۍ په برخه کې ښه اقدام وباله.
