د ننګرهار دره نور کې د یوکانال او سربند رغنیزې چارې پیل شوې

د ننګرهار دکرنې، اوبولګولو او مالدارۍ ریاست چارواکي وایي، چې ددې ولایت د دره نور ولسوالی د جنجپور منجینه کلي کې د اوبولګولو د یو کانال او سربند رغنیزې چارې پیل شوې.
ددې پروژې په پرانیست غونډه کې د ننګرهار دکرنې، اوبولګولو او مالدارۍ رییس مولوی محمد ولي محسن او یوشمېر نورو سیمه ییزو چارواکو ګډون درلود.
د يادې پروژې د پرانیستې په مراسمو کې د ننګرهار د کرنې رییسس مولوي محمد ولي محسن د کانال په جوړیدو خوښې وښوده او ویې ویل، چې دغه پروژې د ملګرو ملتونو د پراختیایي ادارې«یو،ان،ډي،پي» په مالي او د اکشن اېډ مؤسسې په تخنیکي همکارۍ د درې میلیونه افغانیو په لګښت پلې کېږي، چې په کې ۵۵۴ متره کانال او۲۲ متره سربند شامل دي. ښاغلی محسن د «یو،ان،ډي،پي»  او اکشن ايډ مؤسسې له مسئولينو مننه وکړه او غوښتنه يې وکړه ترڅو په نورو ولسوالیو کې هم دا ډول پروژې پلې کړي.
دننګرهار د کرنې رییس مولوي محمد ولي محسن وويل: «دغه کانال دکرنې ریاست تر څارنې لاندې جوړېږي، چې د درنور ولسوالی په منجینه کلی کې به  نږدې څلور زره جریبه ځمکو ته د اړتیا وړ اوبو برابرولو ترڅنګ ۲۰۰۰ د سیمي خلکو ته د کار زمینه هم برابره شي، چې په نږدې وخت کې به ګټې اخیستنې ته وسپارل شي او د سيمې زرګونه کورنۍ به ترې ګټه پورته کړي.» نوموړي زیاته کړه، چې هڅه کوي ترڅو په نورو ولسواليو کې هم د کرنې، اوبو لګولو، بڼوالۍ او مالدارۍ په برخه کې ګټورې پروژې پلې کړي.
د ننګرهار د اقتصاد ریاست استازي مولوي نظیم ګل وويل، چې اداره يې ټولو سکتورونو ته پر وخت پروژې ور وپېژني، مؤسسو سره کاملاً همکاري لرو، له مؤسسو څخه يې د نورو پروژو پلې کولو او له ولس څخه د پروژو په ساتنه کې د همکارۍ غوښتنې وکړې.
په همدې حال کې د اکشن اېډ مؤسسې رییس صفي الله خلیلزی د کرنې ریاست او اړونده ادارو له مسئولينو مننه وکړه، چې په چارو کې ور سره همکاري کوي.
ښاغلي خلیلزي وویل اکشن اېډ یاده پروژه د ننګرهار په لسو ولسوالیو کې د بڼوالۍ، پروسس،، بازارموندني، شنوخونو، کانالونو جوړولو او نورو برخو کې بزګرانو ته چوپړتیاوې وړاندې کوی.