د کندهار ښورابک کې د شملغي طبي بوټي د پریکولو مخه ونیول شوه
د کندهار کرنې، اوبو لګولو او مالدارۍ ریاست اړوند د ښورابک ولسوالی د کرنې او مالدارۍ مسؤلینو د یادې ولسوالی په بېلابېلو سیمو کې د طبی بوټو د ساتنې او پریکولو د مخنیوي په موخه کمپاین ترسره کړی، چې په ترڅ کې یې د ارازني په سیمه کې د طبیعي بوټو د پریکولو مخه نیول شوې ده.
د ښورابک ولسوالی د کرنې او مالدارۍ مسؤل مولوي نیازمحمد رهبر وایي، دا کمپاین مو د یوې ورځې په لړ کې د ولسوالی په بېلابېلو ځنګلي او طبیعي بوټو لرونکو سیمو کې ترسره کړی، چې د یاد کمپاین په ترڅ کې د ارازني په سیمه کې د شملغی طبیعي بوټي د پریکولو مخه نیول سوې، او په تړاو یې یو عراده ټراکټور او دوه کسان نیول شوي دي.
د یادونې وړ ده، چې د کندهار د کرنې ریاست په دې وروستیو کې د طبیعي بوټو د قاچاق او پریکولو د مخنیوي لپاره ګڼ کمپاینونه کړي او هیچاته اجازه نه ورکوي چې د هېواد طبیعي شتمنۍ زیانمنې کړي.
