ننګرهار کې د مالدارۍ فرعي محصولاتو کاروباریانو ته دوه ورځنۍ روزنه ورکړل شوه

۱۷ لېندۍ ۱۴۰۳ه‍.ش
۶ جُمَادَى الثاني۱۴۴۶ه‍.ق
د ننګرهار د کرنې، اوبو لګولو او مالدارۍ ریاست سره په همغږۍ د افغانستان لپاره د هالینډ کمېټې په تخنیکي همکارۍ او د ننګرهار او لغمان ولایتونو ۴۴ د مالدارۍ فرعي محصولاتو کاروباریانو ته د حفظ الصحې مراعت کولو، ناروغیو مخنیوي او وړیو مینځلو په برخه کې دوه ورځني روزنه ورکړل شوه.
دننګرهار د کرنې، اوبو لګولو او مالدارۍ رییس مولوي محمد ولي محسن د وړیو او کشمیرې او نورو فرعي محصولاتو پر ارزښت، کاروبار، او اړتیا تفصیلی خبرې وکړې.
ښاغلي محسن یاد ورکشاپ د وړیو مینځلو او ناروغیو مخنیوي په برخه کې اړین وباله او خصوصي سکتور پیاوړتیا په برخه کې د هر راز همکارۍ ډاډ ورکړ.
د هالینډ کمېټې د ختیځ زون مسؤل داکتر رحیم الله سلیمي وویل، چې دوی څو میاشتې وړاندې د ننګرهار او لغمان په مختلفو ولسوالیو کې د مالدارۍ فرعي محصولاتو د خرڅلاو مرکزونو جوړولو ترڅنګ اړین وسایل او نغدې پیسې هم ورکړې وې.
ښاغلي سلیمي وویل، چې د خصوصي سکتور د پیاوړتیا او  د دوی کاروبار لا وغوړیدا په موخه وخت پر وخت ورته روزنیز پروګرامونه برابروي.