خوست کې ۴۱۱ بزګرانو ته د غنمو اصلاح شوی تخم او کیمیاوي سره ووېشل شوه

۱۴ لړم ۱۴۰۳ه‍.ش
۲ جُمَادَى الأول ۱۴۴۶ه‍.ق
په خوست ولایت د علیشیرو او تریزیو ولسوالیو کې د بزګرانو د حاصلاتو لوړولو، کرنیزو فعالیتونو پیاوړتیا او اقتصادي وضعیت ښه کولو په موخه ۴۱۱ مستحقو بزګرانو ته د غنمو اصلاح شوی تخم او کیمیاوي سره ووېشل شوه. د وېش بهیر د کرنې، اوبو لګولو او مالدارۍ ریاست تر څارنې لاندې او د (ان اې سي) مؤسسې په همکارۍ ترسره شو.
په دې مرسته کې هر بزګر ته ۵۰ کیلوګرامه د غنمو اصلاح شوی تخم، ۵۰ کیلوګرامه توره سره او ۵۰ کیلوګرامه سپینه سره ورکړل شول. دا مرسته به بزګرانو ته د غلې تولید په زیاتولو او اقتصادي وضعیت په ښه کولو کې اغېزمنه وي.
دا بهیر د کرنې په برخه کې د دوامدار پرمختګ یوه برخه ده، چې موخه یې د بزګرانو د تولید لوړول او سیمه‌ییز اقتصاد پیاوړي کول دي.