د کندهار ژړۍ کې ۶۰ بڼوالو او بزګرانو ته د اوبو مدیریت ورکشاپ دائر شو
د کندهار د کرنې، اوبو لګولو او مالدارۍ ریاست په مشرۍ، د ماین پاکۍ هلو سرسټ سازمان په مالي ملاتړ او د افغانستان اقلیم او چاپېریال ساتنې مؤسسې په همکارۍ، په ژړۍ ولسوالۍ کې د ۶۰ بڼوالو او بزګرانو لپاره د اوبو مدیریت ورکشاپ جوړ شو.
په دې یو ورځني ورکشاپ کې ګډونوالو ته د بڼونو او کرنیزو ځمکو لپاره د اوبو لګولو او مدیریت اړوند مهمې زده کړې ورکړل شوې. د دې ورکشاپ موخه د اوبو سپما، د اوبو ضایع کېدو مخنیوی، او د یو ګټور سیسټم معرفي کول وو، ترڅو بزګران او بڼوال وکولای شي اوبه په مؤثر ډول وکاروي.
ګډونوالو د ورکشاپ د ترسره کېدو څخه خوښي وښوده او څرګنده یې کړه چې دا زده کړې به د هغوی د بڼونو او ځمکو لپاره د اوبو په ښه مدیریت کې مرسته وکړي.
د یادولو ده چې د اقلیم او چاپېریال ساتنې سازمان پلان لري چې په نږدې راتلونکي کې په ژړۍ ولسوالۍ کې دوه د اوبو زیرمې او د اوبو مدیریت سیسټمونه جوړ کړي، ترڅو بزګران وکولای شي په لږو اوبو زیاته ځمکه خړوبه کړي.
