د لغمان قرغیو کې درې زره بزګرانو ته د غنمو اصلاح شوي تخمونه او کیمیاوي سرې ووېشل شوې
د لغمان ولایت په قرغیو ولسوالی کې درې زره بزګرانو ته د غنمو اصلاح شوي تخمونه او کیمیاوي سرې ووېشل شوې. دا وېش د افغانستان د راتلونکو نسلونو مووسسې په تخنیکي همکارۍ او د خوړو او کرنې نړۍوال سازمان په مالي ملاتړ ترسره شو.
د مرستې د وېش پیل د لغمان د کرنې، اوبولګولو او مالدارۍ رییس مولوي عبدالستارمحمد، د عدلیې رئیس مولوي عبدالستارحماس، د امنیې قوماندانۍ مرستیال مولوي حبیب الرحمن، د کرنیزو چارو امر انجینر بریالي همدرد، د (اف، جي، ای) مووسسې ولایتي مسوول نویدالله لطفي او د قرغیو ولسوالۍ د کرنیزو چارو مدیر انجینر ظابط امرخیل په لاسونو ترسره شو.
د کرنې رئیس مولوي عبدالستارمحمد وویل: چې دا مرسته د خوړو او کرنې نړۍوال سازمان په مالي همکارۍ د قرغیو ولسوالۍ درې زره بزګرانو ته ورکول کېږي. هغه زیاته کړه چې هر بزګر ته ۵۰ کیلو ګرامه د غنمو اصلاح شوی تخم، ۵۰ کیلو ګرامه سپینه سره، او ۵۰ کیلو ګرامه توره سره ورکول کېږي. نوموړي د مووسسې او د خوړو او کرنې نړۍوال سازمان له مسوولینو څخه مننه وکړه او غوښتنه یې وکړه چې دغه مرستې دې زیاتې شي او نورو ولسوالیو ته دې هم وغځول شي، ځکه د لغمان اکثره خلک غریب دي او مرستو ته اړتیا لري.
مولوي عبدالستارمحمد بزګرانو ته د میکانیزه کرنې پر ګټو هم خبرې وکړې او هغوی یې د غنمو عصري کرنې ته وهڅول.
د لغمان ولایت د کرنې ریاست د نړۍوالو مووسسو په همکارۍ په کرنیزو برخو کې د اصلاح شویو تخمونو او سرې وېش لړۍ دوامداره ساتلې ده. دا مرستې د بزګرانو د کرنیزو حاصلاتو د زیاتوالي او د ولایت د اقتصادي حالت د ښه والي په موخه ترسره کېږي.
