د چپرهار ولسوالۍ مشرانو د ننګرهار دکرنې رییس سره د بزګرانو او مالدارانو ستونزې شریکې کړې

۱۷ زمری ۱۴۰۳ه‍.ش
۳ صَفَر المُظَفَّر ۱۴۴۶ه‍.ق
د چپرهار ولسوالۍ قومي مخورو او مشرانو د ننګرهار د کرنې، اوبو لګولو او مالدارۍ رییس مولوي محمد ولي محسن سره د چپرهار ولسوالۍ د بزګرانو او مالدارانو ستونزو حل په موخه وکتل.
د قومي مخورو په استازیتوب ملک محکم دولتزی او ملک غظیم خان خبرې وکړې او په چپرهار ولسوالۍ کې د کرنې او مالدارۍ برخي د ستونزو حل او فرصتونو معلومات وړاندې وکړل.
ملک محکم خان دولتزی وویل چپرهار ولسوالۍ یو له هغو ولسوالیو ده چې وچکالۍ ډېر ځپلي او بزګران او مالداران له ستونزو سره لاس او ګریوان دي.
نوموړي زیاته چې په چپرهار ولسوالۍ کې د ځمکي لاندې اوبو سطحه ورځ تر بلې په کمېدو ده نو د لوړوالي په موخه باید په چپرهار ولسوالۍ کې چکډېمونه، کاریزونو پاکول، رغول، بندونه، سر بندونه او ورخونه جوړ شي.
دغه راز یې د اصلاح شوي تخمونو، کیمیاوي سرو، بڼوالۍ، چرګانو وړو فارمونو، څارویو واکسینونو،حیواني خوراکي او ګڼو نورو برخو کې خپلې غوښتنې او ستونزې شریکې کړې.
د ننګرهار د کرنې، اوبو لګولو او مالدارۍ رییس مولوي محمد ولي محسن راغلو مشرانو ته د ښه راغلاست ترڅنګ د کرنې او مالدارۍ په برخه کې د هر راز همکارۍ ډاډ ورکړ.
د ننګرهار د کرنې رییس وویل د همکارو موسساتو سره په اړیکه کې دي ترڅو هغو ولسوالیو ته چې وچکالۍ او طبیعي پیښو ځپلي جدي پاملرنه وکړي.