د کرنې وزارت د یوشمېر ولایتي رییسانو ادلون بدلون

۲۰ غویی ۱۴۰۳ه‍.ش
۱ ذوالقعده ۱۴۴۵ه‍.ق
دکرنې، اوبولګولو او مالدارۍ وزارت د وړاندیز او د افغانستان اسلامي امارت د ریاست الوزراء د حکم پر اساس دکرنې وزارت یوشمېر ولایتي رییسان تغییر او تبدیل شوي دي.
ددې ادلون بدلون په ترڅ کې د ننګرهار دکرنې مخکینی رییس د لغمان دکرنې د رییس په توګه، د لغمان دکرنې مخکینی رییس د ننګرهار دکرنې د رییس په توګه او د خوست دکرنې رییس د پکتیکا دکرنې د رییس په توګه د یادو ولایتونو دکرنې ریاست کارکوونکو ته ور وپېژندل شول.
د ننګرهار مرستیال ولي مولوی سعید احمد بنوري د ننګرهار د کرنې د نوي رییس د پېژندنې په مناسبت جوړو شویو مراسمو کې تغییر او تبدیل په دولتدارۍ کې یو مهم اصل وباله او زیاته یې کړه: « په اسلامي نظام کې د آمر په يو حکم سره تغییرات راځي او مسئولين د حکم اطاعت کوي، چې دا د نظام لويه ښېګڼه ده».
د ننګرهار مرستيال والي مولوي سعيد احمد بنوري د ننګرهار د کرنې مخکيني رییس مولوي عبدالستار محمد، چې اوس د لغمان دکرنې رییس په توګه ګمارل شوی دی؛ د ښو کړنو، اخلاص او پاک نفسۍ ستاينه او قدرداني وکړه همدا راز يې د ننګرهار دکرنې نوی رییس مولوی محمد ولي محسن چې تر دې مخکې د لغمان دکرنې رییس په توګه دنده ترسره کوله ورته سپارښتنه وکړه، چې ننګرهار لوی ولايت دی بايد خپلې چارې صادقانه پرمخ يوسي او خلکو ته د کرنې، اوبو لګولو او مالدارۍ په برخه کې په موثره توګه خدمت وکړي.
مرستيال والي مامورينو ته سپارښتنه وکړه، چې نوي رییس سره همکاري وکړي همدا راز يې ولايت مقام له لوري د همکارۍ ډاډ ورکړ.
په ورته وخت کې د ننګرهار د کرنې مخکيني رییس مولوي عبدالستار محمد د خپلو مامورينو له همکاريو مننه وکړه او زياته يې کړه، چې په لغمان کې به هم په پوره اخلاص دنده تر سره کړي.
دغه راز د ننګرهار د کرنې نوی رییس مولوي محمد ولي محسن د ولايت مرستيال ته ډاډ ورکړ چې خپل مسئوليتونه به په پوره اخلاص او ابتکار سره پرمخ يوسي.
بلخوا د خوست دکرنې، اوبولګولو او مالدارۍ ریاست کې په جوړه شویو مراسمو کې ددې ولایت د کرنې د پخوانی رییس مولوی محمدزمان عمري د کړنو او فعالیتونو ستاینه وشوه او ښاغلي عمري ته په نوي دنده کې د بریالیتوب دعاء وشوه.
د ویلو ده، چې ښاغلی عمري د پکتیکا د کرنې د نوي رییس په توګه ګمارل شوی دی.
باید وویل شي، چې د افغانستان اسلامي امارت د رهبرۍ د لوزم دید له مخې د کرنې وزرات یوشمېر ولایتي رییسان تغییر او تبدیل شوي دي.