ننګرهار کې لسګونو کروندګرو سره د جوارو تخم او کیمیاوي سرو مرسته وشوه

۲۷ چنګاښ ۱۴۰۲ه‍.ش
۱ مُحَرَّمُ الحَرام ۱۴۴۵ه‍.ق
د ننګرهار ولایت کرنې، اوبولګولو او مالدارۍ ریاست تر چتر لاندې د «کورډیټ-ډارا) مؤسسې په مالي او د افغانستان لپاره د کلیو د بیارغونې مؤسسې په تخنیکي همکارۍ ددې ولایت په دوو ولسوالیو کوټ او بټی کوټ کې  ۱۹۷ کروندګرو سره د جوارو اصلاح شوي تخمونو، کيمياوي سرو او کرنیزو توکو مرسته وشوه.
د ننګرهار کرنې، اوبولګولو او مالدارۍ رییس مولوي عبدالستار محمد وایي؛  کرنیزه کڅوړه هغو بېوزله بزګرانو ته ورکړل شوه،  چې د اصلاح شوی تخمونو د اخیستو توان یی نه درلودل.  
د ننګرهار دکرنې رییس زیاته کړه، چې یاده کڅوړه کې پینځه قلمه توکي، دوه کیلو د جوارو اصلاح شوي هایبریډ تخم، ۲۵ کیلو  توره او۵۰ کیلو  یوریا کیمیاوي سره،  یو رمبه او لور شامل دي.
همدارنګه بزګرانو ته د جوارو د کتاري کرنې،  اوبخور،  هرزه بوټو کنترول، سري ورکونې،  ناروغیو د مخنیوي او حاصل ټولونې په موخه روزنه هم ورکړل شوه.
ددې مرستې موخه د بېوزله بزګرانو ملاتړ او په ټوله کې په دې ولایت کې د جارو کرکیلي ترویج او د حاصلاتو ډېروالی دی.