پکتیکا کې پر۱۴۸ بڼوالو د بڼوالۍ اړونده توکو او کیمیاوي سرو وېش لړۍ پیل شوه

۲۷ چنګاښ ۱۴۰۲ه‍.ش
۱ مُحَرَّمُ الحَرام ۱۴۴۵ه‍.ق
د پکتیکا دکرنې، اوبولګولو او مالدارۍ ریاست چارواکي وایي، چې ددې ولایت د څلورو ولسوالیو پر هغو بڼوالو چی سږ کال د کرنې او مالدارۍ ریاست په هڅو د سولې بنسټ مؤسسې له خوا ورته نوی د مېوې بڼوڼه اېښودل شوي وو د بڼوالۍ اړونده توکو او کیمیاوی سرو د وېش لړۍ پیل شوی دی.
 په همدی موخه جوړه شوې غونډه کې د پکتیکا دکرنې، اوبولګولو او مالدارۍ رییس مولوی شېر احمد ذبیح له بزګرانو او بڼوالو وغوښتل، چې له دغو مرسته شویو توکو او کیمیاوي سرو څخه په سمه توګه ګټه پورته کړي. ښاغلی ذبیح وویل هلې ځلې کوي، چې د پلان مطابق نور بنسټونه هم راجلب کړي، چې د بزګرانو او بڼوالو لپاره په بېلابېلو برخو کې کار وکړي.
د چارواکو په خبره دغه مرسته د سولې بنسټ مؤسسې د کرنیزو محصولاتو د بازارموندنې پروګرام له لارې د پکتیکا دکرنې، اوبولګولو او مالدارۍ ریاست تر چتر لاندې پر ۱۴۸ بڼوالو وېشل کېږي، چې په کې د ښاخ بُری وسایلو ترڅنګ ۵۰ کیلوګرامه سپینه او ۲۵ کیلوګرامه توره سره شمال دي.
  له وېشل شویو مرستو موخه په دغه ولایت کې د بڼوالو لاسنیوۍ او د بڼوالۍ مسلک ته وده ورکول ښودل شوی دی.