میکانیزه کرکیلې په پآر هڅې؛ لوګر کې پر سلګونو بزګرانو کوچني ټراکټورونه ووېشل شول

۱۹ چنګاښ ۱۴۰۲ه‍.ش
۲۲ ذی‌الحِجّة ۱۴۴۴ ه‍.ق
د لوګر ولایت دکرنې، اوبولګولو او مالدارۍ ریاست وایي، چې ددې ولایت د مرکز  پُل علم ،محمدآغې او خروار ولسوالۍ د بزګرانو پر ۱۳ ګروپونو چې ترې په مستقیم او غیرمستقیمه توګه ۱۵۰۰ تنه بزګران ګټه پورته کوي ۱۳ عرادې کوچني ټراکټورونه وېشلي دي.
په همدی موخه د لوګر د کرنې او مالدارۍ ریاست په انګړ کې د یادو ټراکټورونو دوېش غونډه جوړه شوې وه، چې پکې دلوګرولایت مرستیال والي مولوی عنایت الله شجاع سربېره دلوګر دکرنې او مالدارۍ رییس، ګڼ شمېر چارواکو او د رسنیو استازو ګډون کړی وو.
د لوګرمرستیال والي په خپلوخبرو کې له مستفدینو (ګته اخیستونکو)وغوښتل تر څو له وېشل شویو ټراکټورونو سمه ګټه پورته کړي.
د لوګر ولایت دکرنې، اوبولګولو او مالدارۍ رییس هم ګټه اخیسونکو ته دمبارکۍ ترڅنګ زیاته کړه هڅه کوی، تر څو د کرنې میکانیزه کولو په برخه کې بزګرانو ته اسانتیاوی برابرې کړي.
باید وویل شی دغه ټراکټورونه چې مالي لګښت یې یونیم میلیون افغانۍ کېږي په لوګر ولایت کې د افغانستان لپاره د بشري قواو د پراختیا ادارې له لوري د کرنې او مالدارۍ ریاست تر چتر لاندی ووېشل شوي دي.
له وېشل شویو ټراکټورونو څخه موخه په لوګر کې د بزګرانو د ظرفیت لوړوالۍ، د کرنې عصری کول، د لوړ او باکیفیته کرنیزو محصولاتو تولید، نوی تکنالوژۍ ترویجول او د کرنې اقتصادي پیاوړتیا ښودل شوي.
میکانیزه کرکېله او یا په کرنه کې له عصري ټکنالوژۍ څخه ګټه پورته کول د حاصلاتو د زیاتوالي او د بزګرانو د اقتصادي ودې لامل کېږي.