بغلان کې د سویابینو کرکیلي ترویج په پار هڅې؛ پر ۳۳۵ بزګرو د سویابینو تخمونه او کیمیاوي سرې وېشل کېږي

د بغلان ولایت  د کرنې، اوبولګولو او مالدارۍ ریاست په هلو ځلو، د ملګرو ملتونو د خوړو او کرنې ادارې په همکارۍ ددې والیت پلخمري، مرکزي بغلان او دهنه غوري ولسوالیو کې پر ۳۳۵ بزګرانو د سویابینو اصلاح شوي تخمونه، توره او سپینه سره او ترڅنګ یې د نباتانو د تقویې په پار د «Inoculant» درملو وېش لړۍ له پلخمري څخه پیل شوی دی.
یادو بزګرو ته به د پلان له مخې د سویابینو ۲۰ کیلوګرامه تخمونه، توره او سپینه سره، درمل او همدارنګه د کرنې او روزنې په اړه عامه پوهاوی هم ورکول شي.
د بغلان ولایت د کرنې ریاست هلې ځلي کوي تر څو ددې ولایت بزګرو ته د غیر مشروع نباتاتو پر ځای د نوو ارزښت لرونکو نباتاتو د کرنې او روزنې زمینه برابره کړي تر څو ددوی په کرنیز اقتصاد کې بهبود او نوښت رامنځته شي .
سویابین بشپړه پروتیني او مغذي مواد لري چې د کورنیو د روغتیا ، په ځانګړي ډول د ماشومانو د خوارځواکۍ په مخنیوي کې رغنده رول لري.
د یادونې وړ ده چې سویابین د کورنیو بازارونو ترڅنګ نړیوال بازار هم لري، چې د بغلان د خاورې، اوبو او هوا سره ښه توافق لري.