د هلمند دکرنې ریاست: تېرو دوو کلونو کې د بېلابېلو مېوو دوه زره جریبه نوې بڼونه جوړ شوي دي 

د هلمند ولایت کرنې، اوبولګولو او مالدارۍ ریاست لخوا، د سولې بنسټ (ROP) مؤسسې په مرسته د تېرو ٢ کلونو په لړ کې سلګونه بزګرو ته ، نږدې ٢٠٠٠ جریبه مختلف النوع مېوه لرونکي بڼونه جوړ شوي دي چې، د نوموړو بڼونو په ترکیب کې بېلابېل مېوه لرونکي نیالګي (لکه شفتالو ، پلم ، ګرینګچ، انار ، انګور ، انځر او نور)  شامل دي، چې دا مهال د شفتالو د حاصلاتو راټولولو چارې پیل ښوې.
د نوموړو حاصلاتو د ارزونې په موخه د هلمند ولایت کرنې ریاست مرستیال مولوي زین الله (زاهد)، د کرنیزو خدمتونو عمومي مدیر قاري صاحب محمدنسیم (مسلم)، د سولې بنسټ ولایتي مسؤل انجنیر خالقداد جلال، د نیالګیو او قوریه لرونکو د ټولنو مسؤل حاجي احمدشاه، د رسنیو همکارانو او ګڼو بڼوالو د ناوې ولسوالی اړوند عینک په سیمه کې په نمونوي ډول له څو بڼونو لیدنه وکړه.
ګډونوالو د شفتالو سږني حاصلات ښه و ارزول او د سیمې بڼوال یې له حاصلاتو خوښ وو.
د یادو بڼونو مالکانو وویل؛ تازه یې د حاصلاتو راټولولو او بازار ته د وړاندې کولو چارې پیل کړي دي، چې له نیکه مرغه یې شفتالو ښه بازار لري او په لوړ قیمت پلورل کېږي.
د یادې لیدنې پر مهال بڼوالو د هلمند د کرنې ریاست څخه غوښتنه وکړه، ترڅو ددغه ډول باغونو جوړولو په برخه کې ددوئ سره لا نورې مرستې وشي او دغه لړۍ دې ټولو ولسوالیو ته وغځول شي.
ورپسې مولوي زین الله زاهد خبرې وکړې، بڼوالو ته یې ډاډ ورکړ چې په راتلونکي کې به هم د بڼونو جوړولو لړۍ دوامداره ساتي او هڅه به وکړي ترڅو ټولې ولسوالۍ په دې پروسه کې شاملې کړي.
هغه همدارنګه د بزګرو د کرنیزې ودې او پیاوړتیا په برخه د لا نورو چوپړتیاو پر برابرولو او د حاصلاتو لپاره د بازار موندنې په برخه کې د لازمو اسانتیاوو برابرولو ژمنې وکړې.