هلمند کې د مضره ملخانو سره د مبارزې په پار کمپاین او عامه پوهاوی پیل شو
١١ غویی ۱۴۰۲ه.ش
١١ شَوّال المُکَرَّم ۱۴۴۴ ه.ق
د هلمند د کرنې ، اوبولګولو او مالدارۍ ریاست لخوا ددې ولایت په واشېر او مارجې ولسوالیو کې د مضره ملخانو د کنترول او مخنیوی په موخه بزګرو ته د عامه پوهاوی کمپاین چارې د فني کارکوونکو په مټ پیل شوي دي.
د هلمند د کرنې ریاست سیمه ییز کارکوونکي وایي، چې د سیمې د بزګرو په غوښتنه یې د واشېر او مارجې ولسوالیو بېلابېلو سیمو کې یاد کمپاین ترسره کړ، د واشېر ولسوالی په ځینو سیمو کې تر دې مهاله کم شمېر ملخان راپیدا شوي دي، چې په دې اړه سیمئیزو مسؤلینو ته لازمې سپارښتنې وشوې، همدارنګه په مارجې ولسوالۍ کې نوموړي مضره ملخان شتون نه لري، چې د اندېښنې وړ وي.
د هلمند د کرنې ادارې لا له وړاندې د مضرو ملخانو د مخنیوي لپاره چمتووالی لري تر څو د کرونده ګرو حاصلات زیانمن نشي.
د هلمند دکرنې ریاست په دې ولایت کې د بزګرانو د فصلونو د خوندي کولو او دوی ته د کرکېلي د نويو لارو چارو د ښودنې په موخه هر اړخیزې برنامې په لاره اچوي، ترڅو د بزګرانو محصولات خوندي او ډېر کړي او ترڅنګ یې د دوی عواید هم زیات شي.
د یادونې وړ ده چې دغه پروسه به د اړتیا له مخې د هلمند ولایت نورو ولسوالیو ته هم وغځول شي.
