هلمند کې تر فتحې مخکې د وېشل شويو ځمکو د ارزونې لړۍ پیل شو
۳ وری ۱۴۰۲ه.ش
۱ رَمَضانُ المُبارَک ۱۴۴۴ ه.ق
د عالیقدر امیرالمؤمنین حفظه الله د شفاهي هدایت او د کرنې، اوبولګولو او مالدارۍ وزارت د رسمي حکم په اساس، ټاکل شوې ده، چې په هلمند ولایت کې د ا.ا.ا تر فتحې مخکې د وېشل سويو ځمکو ارزونه ترسره شي.
په همدې موخه د هلمند ولایت مقام سره په همغږۍ، په دې ولایت کې د یادو ځمکو د ارزونې چارې په عملي ډول پیل شوي دي.
یاده پروسه د هلمند د ولایت مقام، علماؤ شورا ، کرنې ریاست او امنیې قوماندانۍ د ګډو استازو په ترکیب سره د درېوو کاري ګروپونو لخوا ترسره کېږي چې په سیمو کې د وېشل شويو او پاتې امارتي ځمکو د ثبت او راجستر لړۍ پکې شامله ده.
په همدې موخه دهلمند د ولایت مقام، علماؤ شورا، د کرنې ریاست، او امنیې قوماندانۍ د استازو لخوا د زاهد مولوي صاحب په مشرۍ د مارجې او نادعلي ولسوالیو له ګڼو سیمو څخه لیدنې او ارزونې پیل شوي دي. په یاده سيمه کې د سیمې له مشرانو، علماء کرامو او ګڼو ولسي وګړو سره د ناستو تر څنګ، د سیمو خلکو ته د ګډ پلاوي لخوا د پروسې په اړه معلومات ورکول کېږي.
په دې پروسه کې به د ورکړل شوو ځمکو د اسنادو سقم او صحت، د ځمکې د ورکړې مراجع او مستحقین، پاتې ځمکې او د څړځايونو څېړنه او ارزونه ترسره کېږي.
یاد پلاوی به د مشرتابه د هدایت مطابق ټولې هغه ځمکې چې په قانوني ډول یتیمانو، معیوبینو او بې ځمکو کورنیو ته وېشل شوي د اسنادو او سوابقو له مخې توحید او په ځانګړو جدولونو کې ورسوي، ددې ترڅنګ د پاتې امار-تي ځمکو احصائیه او ارقام به هم ترتیب او له توحید څخه وروسته عالي مقاماتو ته وړاندې کړي.
