د سلواغې د ۲۶مې په مناسبت دکرنې وزیر پیغام

د ۱۴۰۱لمریز کال د سلواغې د میاشتې ۲۶ مه له افغانستان څخه د پخواني شوروي اتحاد د سرو لښکرو د ماتې او وتلو له ۳۴ مې کلیزې سره برابره ده.
پخواني شوروي اتحاد د خپل وحشي پوځ پر مټ په خورا استعماري، نظامي او اقتصادي غرور سره زموږ پر هېواد نظامي ظالمانه تېری و کړ؛ نږدې یو نیم مېلیون مظلوم او بیګناه افغانان یې په شهادت ورسول، په مېلیونونو نور یې معیوب او له هېواده مهاجرت ته اړ ویستل، کلي او ښارونه یې په کنډوالو بدل او حکومتي تاسیسات یې ونړول، خو افغانانو يې پر وړاندې د خپلو نیکونو په څېر مقاومت وکړ او د نيږدې ۱۰ کلنې جګړې په پایله کې یې روسانو ته داسې شرمېدلې ماته ورکړه، چې کله به یې هم هیره نکړي روسان یې دې ته اړ کړل چې د ۱۳۶۷ کال د سلواغې په ۲۶مه له افغانستان څخه پښې وباسي.
افغانانو په پوره مېړانه او شهامت سره د نړۍ ستر استعمارګر هېواد دړې وړې کړ او نړۍ ته يې وښوده، چې افغانان په هر ډول حالاتو کې د خپلې خاورې، ناموس او عزت د ساتلو په موخه هرې قربانۍ او سرښندنې ته چمتو دی، او د نړۍ هیڅ قدرت ته به اجازه ور نه کړي چې د افغان ولس د دودونو او مقدساتو پر وړاندې ودريږي.
د سلواغې۲۶مه د افغان ویاړلي تاریخ له هغو روښانو ورځو څخه یوه ده، چې راتلونکي نسلونه به یې تل ترې په پوره ویاړ یادونه کوي او د راتلونکي نسل لپاره به د مېړانې، غېرت او شهامت له درسونو ډک باب وي.
په داسې حال کې د افغان مجاهدو شازلميو او نامتو غازیانو د دغه تاریخي ویاړ مبارکي د افغانستان ټول مجاهد ملت ته وړاندې کوم؛ چې زموږ مجاهدو شازلمیو او نامتو غازیانو د خپلو پلرونو او نیکونو تاریخ یوځل بیا ژوندۍ کړ او غربي استعمار ګرو سره په سپېڅلې مبارزه کې سرلوړې ووتل او نړیوالو ښکیلاکګرو او د هغوی ملاتړو ته هماغسې د عبرت نه ډک درس ورکړل لکه څنګه یې، چې د روس او وارسا کمونیستي بلاک ته ورکړي ؤ.
اسلامي ارزښتونو او د دې خاورې زرین تاریخ ته درناوی او د هغه ساتنه زموږ وجیبه ده، چې هرکله درناوی ورته کوو.
زموږ ګران هېواد افغانستان پراخې کرنيزې ځمکې، پريمانه اوبه، بې ساري انساني ځواک او هر ډول کرکيلې ته مناسبه اقليم لري، خو د استعمارګرو ځواکونو د بې رحمانه يرغل او څه د پاسه څلورو لسېزو جګړو له وجې د نورو بنسټونو ترڅنګ د هېواد د کرنې او مالدارۍ سکټور ته هم درانه زيانونه رسېدلي دي. د اسلامي امارت په بيا واکمنېدو سره په تېر  نږدې يونيم کال کې دکرنې او مالدارۍ سکټور د پياوړ  تيا په پار ډېرې هلې ځلې شوي دي، خو موږ يوځل بيا ژمنه کوو چې ددې مهم سکټور د پياوړتيا او ودې په پار نه ستړې کېدونکي هلې ځلې کوو، تر څو هېواد مو ځان بسياينې ته ورسېږي او له اقتصادي او سياسي اړخه د خپل هېواد خپلواکي وساتو.
په درنښت 
دکرنې، اوبولګولو او مالدارۍ وزیر 
مولوی عطاءالله عمري