د ننګرهار په څلورو ولسوالیو کې نږدې ۱۲ زره جریبه ځمکه امارتي تثبیت شوه
۲۲ سلواغه ۱۴۰۱ه.ش
۲۰ رَجَب المُرَجَّب ۱۴۴۴ ه.ق
ننګرهار کې د امارتي ځمکې د غصب مخنیوی او غصب شویو ځمکو د بېرته راګرځولو تخنیکي پلاوي، چې په کې د ننګرهار د عدلیې رییس، د څارنوالی رییس ، حج اوقافو رییس، کار او ټولنیزو چارو رییس، ښارجوړونې رییس، د ښاروالۍ مرستیال، د ننګرهار مستوفي، د امنیه قومندانۍ مرستیال، د کدستر امر، د قضایای امارت امر د ننګرهار د کرنې، اوبولګولو او مالدارۍ ریس مولوی عبدالستار محمد په مشرۍ د ننګرهار کوټ، بټي کوټ، غني خېل او سپین غر ولسوالیو ته د سفر په ترڅ کې د یادو ولسوالیو په بېلابېلو سیمو کې ۱۱ زره او ۹۷۸ جریبه جریبه اماراتي ځمکه تثبیت کړه.
مولوی عبدالستار محمد وویل، چې 4072 جریبه ځمکه د کوټ او بتې کوټ ولسوالیو تر منځ او 7906 جریبه ځمکه د غني خېلو او سپین غر ولسوالیو تر منځ چې د ځایي خلکو لخوا غصب شوي وه او په ځینو سیمو کې د متصرفینو لخوا په کې غیر شرعي تصرفات شوې وه، چې د تخنیکې پلاوي د بررسۍ او څیړنې په پایله کې د کدستري نقشو په کتنه امارتې تثبیت شوه.
تخنیکې پلاوي رییس د یادو ولسوالیو پر ځایي اوسیدونکو غږ وکړ چې په امارتي غصب شوو ځمکو باندې د تصروفاتو څخه ډډه وکړي، او تر څنګ یي د یادو ولسوالیو امنیه قومندانۍ مسولینو ته سپارښتنه وشوه، چې په یادو سیمو کې د اشخاصو غیر قانوني تصرفاتو مخه ونیسي، او هیچاته اجازه ورنکړي چې په غصب شوو سلطاني ځمکو کې کار او عمرانات وکړې، همداراز ولسونو ته یادونه وشوه که چیرې د یادو ځمکو اړوند هر نوع اسناد ولرې تخنیکې پلاوی ته یې د وروستیو اجرااتو په موخه وړاندې کړی .
باید وویل شي، چې د ځمکو د غصب د مخنيوي کميټې تر دې دمه په ننګرهار ولایت کې د ډېرو امارتي ځمکو د غصب مخنيوی کړی او د ټول ولايت په کچه د ځمکو د غصب د مخنيوي او د غصب شويو ځمکو د بېرته ګرځولو په موخه يې د عملياتي پلان تطبيق جريان لري.
