میدان وردګو کې د لسو کوچنیو پروژو چارې بشپړ او ګټې اخیستنې ته وسپارل شول
د میدان وردګو ولایت دکرنې، اوبولګولو او مالدارۍ ریاست د ملګروملتونو دخوړو او کرنې ادارې «FAO» په مالي او د «FGA» په تخنیکي همکارۍ ددې ولایت د سیدآباد ولسوالی د شیخ آباد او شنیزپه حوزو کې د لسو کوچنیو پروژو چارې بشپړ او ګټې اخیستنې ته سپارلي دي.
د چارواکو په خبره په دغو پروژو کې استنادي دېوالونه، په اساسي ډول د کاریزونو د خولو جوړول او د کاریزونو د اوبو لپاره د حوضونو جوړول شامل دي، چې ۱۵۰ کسانو ته په کې د کار زمینه هم برابره شوې وه.
له دغو پروژو څخه برخمن شوي خلک د یادو پروژو له پلي کېدو څخه د خوښي په څرګندولو سره د میدان وردګو ولایت دکرنې ریاست کړنې او هلې ځلې وستایلې او په راتلونکې کې د ورته او نورو پروژو د پلي کولو غوښتونکي شول.
ددغو پروژو د پلي کولو موخه د اوبو مدیریت، د بزګرانو ملاتړ، خلکو ته د کار زمینه برابرول او په ټوله کې د کرنې د پراختیا په پار هلې ځلې دي.
