د پکتیا دکرنې رییس د ملګروملتونو د خوړو او کرنې ادارې سیمه ییزو چارواکو سره وکتل
۵ سلواغه ۱۴۰۱ه.ش
۳ رَجَب المُرَجَّب ۱۴۴۴ ه.ق
د پکتیا کرنې، اوبولګولو او مالدارۍ رییس مولوي عبدالرؤف سعيد، په دې ولایت کې د ملګرو ملتونو د خوړو او کرنې ادارې «FAO» چارواکو سره په لیدنه کې د ځمکې او ځنګلونو تلپاتې مدیریت پروژې پر فعالیتونو خبرې وکړې.
په دې غونډه کې د پکتیا د چاپېریال ساتنې رییس مولوي عبدالهادي، د کوچیانو ریاست استازی، په پکتیا کې د ځمکې او ځنګلو تلپاتې مدیریت پروژې مسئول محمد ابراهیم قادري(GEF- FAO)، د سیدکرم او احمدآبا د ترویج مدیرانو او د پکتیا دکرنې ریاست د طبیعي سرچینو کارکوونو ګډون کړی و.
په ياده ناسته کې په دوه اړخېزه همکاريو د بحث ترڅنګ د ښې همغږۍ په رامنځته کولو ټينګار وشو، همداراز په پکتیا کی د ځمکې او ځنګلو تلپاتې مدیریت پروژې مسئول محمد ابراهیم قادري له ښاغلی سعید سره د خپلې پروژې د ترسره شویو کړنو او راتلونکو پروژو په اړه معلومات شریک کړل.
د پکتیا دکرنې رییس مولوی عبدالرؤف سعيد په خپلو خبرو کې د يادې مؤسسې له کړنو څخه مننه وکړه او له مسولينو سره د همکارۍ د ژمنې ترڅنګ د يادې مؤسسې له چارواکو وغوښتل، چې یاده پروژه په نورو ولسوالیو کې هم وغځوی او خپلې چارې د کرنې رياست سره په همغږۍ سرته ورسوي، نوموړي همداراز وويل چې د يادو پروژو په پلي کېدو سره به ډېر ځنګل میشتو کورنیو ته اسانتیاوې هم رامنځته کړي.
