لغمان کې د اصلاح شویو غنمو ننداریزې کروندې جوړې شوي دي
د لغمان دکرنې، اوبولګولو او مالدارۍ ریاست د ترکیې هېواد د «IHH»مؤسسې په همکارۍ ددې ولایت په مرکز او ولسوالیو کې کروندګرو سره د ننداریز کروندو جوړولو په موخه د غنمو اصلاح شوو تخمونو او کیمیاوی سرو مرسته شوې وه، چې پر مټ یې په یادو سیمو کې د غنمو ننداریزې کروندې جوړې شوي دي.
د لغمان دکرنې رییس مولوی محمدولي محسن او ورسره مل پلاوی د لغمان ولایت مرکز مهترلام په یوشمېر سیمو کې د غنمو له ننداریزو کروندو څخه د لیدنې پر مهال وویل، چې د ننداریزو کروندو په جوړولو سره کروندګر کولاي شي، چې خپلې تجربې یو له بل سره شریکې کړي.
ښاغلی محسن زیاته کړه، چې د کتار په بڼه د اصلاح شوو تخمونو کرکېله کولاي شي، چې د بزګرانو په حاصلاتو کې د پام وړ زیاتوالی راولي.د کتار په بڼه کرکېله کې د ناروغیو مخنیوی او د هرزه بوټو کنټرول په اسانې سره کېږي.
ددغو ننداریزو کروندو دجوړولو موخه نوي او میکانزه کرکیلې سره د بزګرانو بلدتیا او د دوی د کرنیزو حاصلاتو زیاتولو ته زمینه برابرول دي.
