لوګر کې دځمکو د غصب مخنیوی او د غصب شویو ځمکو بېرته راګرځولو تخنیکي پلاوی د مرکز اړوند ځینو سیمو څخه لیدنه وکړه

۱۲ مرغومې ۱۴۰۱ه‍.ش
۹ جُمادیَ الثّاني ۱۴۴۴ ه‍.ق
د لوګر دکرنې، اوبولګولو او مالدارۍ ریاست وایي، چې ددې ولایت دځمکو د غصب مخنیوی او د غصب شویو ځمکو بېرته راګرځولو تخنیکي پلاوی د لوګر ولایت مرکز پل علم اړوند خلیل آباد، باري او بیدک دښتو څخه لیدنه وکړه.
د چارواکو په خبره د خلیل آباد دښتې اړوند ( ۱،۴۷،۱۶، او ۴۱) قطعات چې ټولیز مساحت یې ۷۴۸۱ جریبه ځمکه کېږي او ذکر شوي قطعات ځیني اشخاص د ظاهر شاه په نوم بولي چې اسناد به یې وڅېړل شي.
د باری دښتی اړوند ۱۲ نمبر قطعه چی ۱۹۴۷.۴۷ جریبه خاصه دولتي ځمکه ده او د هیچا تر دعوا لاندې نده تثبیت شوه، همدارنګه په دغه دښته کی ۳۴ قطعه چې ټولیز مساحت یې ۴۰۸۰.۴۷ جریبو ته رسېږي په کدستر کې امارتي سروی شوې، یوشمېر کسان پرې ادعا لري، چې ډېر ژر به یې اسناد وڅېړل شي.
د بیدک دښتی ۱۰۵ کدستري قطعه چې ۳۲۰۰ جریبه ده د داود خان په وخت کې دولتي سروي او ثبت شوې ده خو د ځینو اشخاصو تر ادعا لاندې ده.
د لوګر دکرنې ریاست چارواکي وایي، چې تر ادعا لاندې قطعاتو اسناد او قبالې به ټاکل شوي پلاوی راټول او له څېړنې وروسته به یې ټاکل شوی کمیسون ته د پاتې اجراتو په پار وسپاري
باید وویل شي، چې د لوګر ولایت د ځمکې د غصب مخنیوی او غصب شویو ځمکو د بېرته راګرځولو کمېټه تر دې دمه په دې ولایت کې د ډېرو ځمکو د غصب مخه نیولی او ترڅنګ یې ډېر غصب شوي ځمکې بېرته راګرځولي دي.