د میدان وردګو ولایت درکرنې رییس: عاشرین دې عشر په پوره احتیاط او نرمۍ سره راټول کړي
۱۱ مرغومې ۱۴۰۱ه.ش
۸ جُمادیَ الثّاني ۱۴۴۴ ه.ق
د میدان وردګو ولایت دکرنې، اوبولګولو او مالدارۍ رییس مولوی عبدالجبار خالد ددې ولایت د ټولو ولسوالیو دعاشرینو له مسوولینو سره په کتنه کې د دوی ستونزې او ننګوونې واورېدل.
په دې کتنه کې د میدان وردګو ولایت دکرنې رییس مولوی عبدالجبار خالد د عشر په راټولولو مفصلې خبرې وکړې او ویې ویل: «عاشرین دې د خلکو څخه عشر په پوره احتیاط او نرمۍ سره راټول کړي او د خلکو له ځورولو، وهلو څخه جدآ پرهیز وکړي.»
ښاغلی خالد وویل، چې د عشر د راټولولو اړوند تراوسه کومه رسمي لایحه نشته او عاشرین دې د حساب تصفیه د هرې ربعې د آخرې میاشتې د 15 څخه تر 25 نېټې پورې وکړي. هغه زیاته کړه، چې عاشرین دی د عوایدو او کتابچو په ساتلو کی د ډیر احتیاط څخه کار واخلي.
دغه راز په دې کتنه کې د عشر مسوولینو هم په خپل وار سره خپلې غوښتنې او ستونزې د میدان وردګو ولایت د کرنې رییس سره شریک کړل. د میدان وردګو ولایت دکرنې رییس د ستونزو او ننګونو د حل ژمنه وکړه.
