ننګرهار کې په څه باندې ۲۷ زره بزګرانو د غنمو اصلاح شوي تخمونه وېشل شوي دي
۲۱ لړم ۱۴۰۱ه.ش
۱۷ ربیعالثانی ۱۴۴۴ ه.ق
په ننګرهار کې د غنمو کرکېله د کرنې، اوبولګولو او مالدارۍ وزیر عطاء الله عمري له لوري د شیشم بڼ د نباتاتو څېړنیز فارم کې رسماً پیل شو.
په دې اړه جوړه شوې غونډ کې، د ننګرهار د کرنې ادارې رییس مولوی عبدالستار محمد د کرنې، اوبولګولو او مالدارۍ سرپرست وزیر ته یادونه وکړه چې ننګرهار کې د تېرو کلنو په پرتله سږکال دوه برابره زیات د غنمو اصلاح شوي تخمونه او کیمیاوی سرې کروندګرو ته وېشل شوي دي.
محمد زیاته کړه چې د ملګرو ملتونو د خوړو او کرنې ادارې (FAO) پر مټ د ننګرهار په 22 ولسوالیو کې څه د پاسه 27 زره کروندګرو ته څلور زره ټنه د غنمو اصلاح شوی تخمونه او کیمیاوی سرې وېشل شوي دي، او د کرکیلې په موخه بزګرانو ته روزنې هم ورکول شوي دي، او تمه کېږي چې سږکال به په ننګرهار کې د غنمو حاصلاتو کې د پام وړ زیاتوالي راشي.
