د ننګرهار په ۲۲ ولسوالیو کې په څه باندې ۲۷ زره بزګرانو د غنمو اصلاح شوي تخمونو او کیمیاوي سرو وېش لړۍ پیل شوی
۸ لړم ۱۴۰۱ه.ش
۴ ربیعالثانی ۱۴۴۴ ه.ق
د ننګرهار د کرنې، اوبولګولو او مالدارۍ رییس مولوی عبدالستار محمد وایي، چې د خوړو او کرنې نړیوال ادارې (FAO) په مالي او د اکشن آیډ مؤسسې په تخنیکي همکارۍ د دې ولایت په ۲۲ ولسوالیو کې ۲۷ زره او ۳۵۰ کروندګرو ته د څه باندې ۱۳۶۷ ټنه اصلاح شوي تخمونه، څه باندې ۱۳۶۷ ټنه DAP او څه باندې ۱۳۶۷ ټنه یوریا کیمیاوی سرو د وېش لړۍ پیل شوی دی.
ددې لړۍ په ترڅ کې هر بزګر ته ۵۰کیلوګرامه د غنمو اصلاح شوي تخمونه او ۵۰ کیلوګرامه یوریا او ۵۰ کیلوګرامه DAP سره وېشل کېږي، چې ددې اوونۍ تر پایه بشپړ کېږي.
یوشمېر بزګران خوښ برېښي او وایي، چې د غنمو تخمونه یې په خپل وخت تر لاسه کړه او په خپل وخت به یې کرکېله تر سره کړي او په پایله کې به ښه حاصل ترلاسه کړي.
د ننګرهار دکرنې رییس عبدالستار محمد دغه راز وویل، چې ددې ولایت په بېلابېلو ولسوالیو کې د ننداریزو قطعو جوړولو په پار هم په ۱۴۴۰ بزګرانو د غنمو اصلاح شوي تخمونه او څه باندې ۷۴ ټنه کیمیاوي سروې وېشل شوي دي، چې موخه یې د اصلاح شویو تخمونو دودول دي، تر څو کروندګر تشویق شي او وکولاي شي په کم مصرف له لږې ځمکې څخه زیات حاصل لاسته راوړي.
