د امارتي غصب شویو ځمکو د بېرته راګرځولو په پار هڅې

۲تله ۱۴۰۱ه‍.ش
۲۷صَفَرالمظفّر ۱۴۴۴ ه‍.ق
د کرنې، اوبولګولو او مالدارۍ وزارت له خوا رسمي پلاوی، چې مشري یې د کابل ولایت دکرنې رییس الحاج حافظ شیخ عبیدالله حقاني پرغاړه د خوست او پکتیکا ولایتونو د غصب شویو ځمکو د هر اړخیز ارزونې په پار یادو ولایتونو ته سفر کړی دی.
یاد پلاوی ددې سفر په ترڅ کې د پکتیکا ولايت اړوند بېلابېلو امارتي ځمکو( د شرنې شا او خوا، یوسف خېل ولسوالی، پي.آر.تي شا او خوا پرتو ځمکو، متاخان ولسوالی اړوندو ځمکو، د سردې بند شا او خوا ځمکو، د کاکۍ غره دښتو) او داسې نورو بېلابېلو امارتي ځمکو څخه ليدنه وکړه.
ددغو لیدنو په ترڅ کې، چې د پکتیکا دکرنې رییس هم د یاد وپلاوي ملتیا کوله ټول غصب شوي امارتي ځمکې په دقیقه توګه وارزول شول او د مسلکي ټیم له خوا د یادو سیمو کوردنات هم واخیستل شوه.
 باید وویل شي، چې د ځمکو د غصب د مخنيوي کميټې تر دې دمه په هېواد کې د ډېرو امارتي ځمکو د غصب مخنيوی کړی او د ټول هېواد په کچه د ځمکو د‌ غصب د مخنيوي او د‌ غصب شويو ځمکو د‌ بېرته ګرځولو په موخه يې د عملياتي پلان تطبيق جريان لري.
د دولتي ځمکو له غصب سره د مبارزې کمیټه د ولایت مقام، امنیه قوماندانۍ، د کرنې ریاست، د محکمو او څارنوالۍ، ښاروالۍ او د ښار جوړونې او ځمکو د ریاستونو له استازو څخه جوړه ده، چې مشري یې د کرنې ریاست کوي.