د پکتیا سیدکرم کې یوشمېر کورنیو ته د هګیو چرګانو فارمونه جوړ شول
۲۳ وږی ۱۴۰۱ه.ش
۱۷ صَفَرالمظفّر ۱۴۴۴ ه.ق
د پکتیا دکرنې، اوبولګولو او مالدارۍ ریاست وایي،چې دیاد ریاست اړوند د ټولنې په ګډون د ځمکې او ځنګلونو تلپاتې مدیریت پروژې په همکارۍ د سیدکرم ولسوالی پر هغو سلو کورنیو د هګیو چرګانو فارمونه وېشل شوي، چې د ځنګلونو په ساتلو او بیا رغونه کې یې په لوړه کچه کار کړی وو.
دغه راز د یادې برنامې مسوولینو دوی ته ډاډ ورکړ چې په ورته ډول د ځنګلونو د ښې ساتنې په باره کې به دغه ډول اقتصادي همکارۍ لا زیاتې کړي.
د یادولو وړ ده، چې په نوموړو فارمونو کې هرې کورنۍ ته ۳۰ قطعي هګۍ اچوونکي چرګې او ۲۵۰ کیلو ګرامه معیاري خوراکه ووېشل شوه.
همدارنګه د اوبو او دانو لوښی ، چونه او د چرګو د ساتلو خونې لپاره د اړتیا وړ توکې هم ورته څو ورځی وړاندی وېشل شوي وو.
د پکتیا دکرنې ریاست چارواکي وایي، په پلان کې ده چې یادو فارمونو ته به په راتلونکې کې د بیا ځل واکسین او ویټامین لرونکي خوارکي توکي هم ووېشل شي، دغه راز د روزنې ،پالنې او د واکسینونو د استمعال په برخه کې به په دوامداره ډول ورکشاپونه هم ورته په لاره واچول شي.
دغه فارمونه ګټه اخستونکو کورنیو ته د کاري مصروفیت په پیداکولو سربېره د هغوی په اقتصادي وضعیت هم مثبت اغیز ولري .
