پکتیا کې د ځنګلونو د موجودی په هکله ورکشاپ پیل شو

۲۳ وږی ۱۴۰۱ه‍.ش
۱۷ صَفَرالمظفّر ۱۴۴۴ ه‍.ق 
د پکتیا کرنې، اوبولګولو او مالدارۍ ریاست اړوند د ځمکې او ځنګلونو تلپاتې مدیریت پروژې(FAO-GEF) له لورې د کرنې، اوبولګولو او مالدارۍ ریاست، د کلیو د بیارغونې او پراختیا، چاپېریال ساتنې او د کوچیانو چارو د سمون آمریت او د احمدابا او سیدکرم ولسوالیو د ترویج مدیرانو په ګدون ۲۵ تنو کارکوونکو ته د ځنګلونو د موجودی(Forest Inventory) په هکله دوه ورځنۍ ورکشاپ پیل شو.
د پکتیا د کرنې، اوبولګولو او مالدارۍ سرپرست رییس او د طبیعي سرچینو آمر مولوي احسان الله احسان د ورکشاپ ګډونوالو ته د ښه راغلاست ترڅنګ وویل، چې ځنګلونه زموږ ملي شتمنۍ دي، د هغوی پالنه، ساتنه او پراختیا زموږ مئسولیت دی، په یاده برخه کې د زده کړو ترلاسه کول زموږ سره د طبیعي سرچینو په موثر مدیریت کې مرسته کوي.
 همداراز ښاغلی احسان  زیاته کړه، چې پکتیا ولایت د ځنګلونو له مخې بډایه ولایت دی، چې په یاده برخه کې د همدا ډول روزنیزو پروګرامونو جوړولو ته اړتیا لیدل کېږي، ښاغلي احسان له ګډونوالو وغوښتل، چې د یاد ورکشاپ ټولو موضوعات په ښه ډول تعقیب او له ترلاسه شويو تجربو څخه په سیمه کې ګټه پورته او له ځنګل مېشتو سره يې هم شریکې کړي، تر څو د ځنګلونو په مدیریت کې ښه والی رامنځته شي.
 د ځمکې او ځنګلونو د تلپاتې مدیریت پروژې ولایتې مسوول ښاغلي محمد ابراهیم قادري وویل، چې د یاد ورکشاپ موخې د ځنګلونو وده، ذخیرې تخمینول، د ځنګلونو د سیمو اندازه، شکل او د ځنګلونو د تلپاتې عملیاتي پلان چمتو کول دي، چې د ځنګلونو د ټولنیز مدیریت او د ځنګلونو د دقیق مقدار او حالت معلومولو لپاره مهم وباله.
د یادولو وړ ده، چې په یاد ورکشاپ کې به ګډونوالو ته د ځنګلونو د موجودی  په برخه کې عملي او نظري زده کړې ورکړل شي.