کابل کې د دولتي ځمکو د غصب مخنیوی په پار هلې ځلې
۲۱ وږی ۱۴۰۱ه.ش
۱۵ صَفَرالمظفّر ۱۴۴۴ ه.ق
د کابل دکرنې، اوبولګولو او مالدارۍ ریاست چارواکي وایي، چې په دې ولایت کې د دولتي ځمکو د غصب مخنیوی په پار یې هلې ځلې ګړندي کړي دي.
د چارواکو په خبره ددغو هلو ځلو په دوام د کابل ولایت په څو بېلابېلو سیمو کې عملیات ترسره شوې، چې په بګرامی ولسوالی کې د سیدجماالدین ښارګوټۍ او حبیب الله ځاځی پارک سیمو کې یوشمېر کسانو او دغه راز د پغمان په ولسوالی کې هم یوشمېر کسانو چې شخصي او دولتي ځمکې غصب کړي وې د اړوندو چاروکو له خوا ټول تصرفات یې بند او اړوندو ادارو ته ور وپېژندل شول.
د ځمکو د غصب د مخنيوي کميټې تر دې دمه په کابل کې د ډېرو امارتي ځمکو د غصب مخنيوی کړی او د ټول ولايت په کچه د ځمکو د غصب د مخنيوي او د غصب شويو ځمکو د بېرته ګرځولو په موخه يې د عملياتي پلان تطبيق جريان لري.
د دولتي ځمکو له غصب سره د مبارزې کمیټه د ولایت مقام، امنیه قوماندانۍ، د کرنې ریاست، د محکمو او څارنوالۍ، ښاروالۍ او د ښار جوړونې او ځمکو د ریاستونو له استازو څخه جوړه ده، چې مشري یې د کرنې ریاست کوي.
