دکندز دکرنې رییس: هغو ولسوالیو ته لومړیتوب ورکوو چې له پراختیایي پروژو برخمن شوي نه وي

۱۱ وږی ۱۴۰۱ه‍.ش
۵ صَفَرالمظفّر ۱۴۴۴ ه‍.ق
دکندز دکرنې، اوبولګولو او مالدارۍ رییس الحاج مولوی امان الله حسن؛ د ملګرو ملتوونو د خوړو او کرنې ادارې (FAO) د شمال ختیځ زون مسوول اونورو چاروکو سره په لیدنه کې، په دې ولایت کې د پراختیایي پروژو پر پلي کولو خبرې وکړې.
په دې لیدنه کې د کندز دکرنې رییس الحاج مولوی امان الله حسن وویل: «د پراختیایي پروژو د پلي کولو او د مرستو د وېش په برخه کې هغو لسوالیو ته لومړیتوب ورکوو، چې په تېرو کلونو کې په کې پراختیاي پروژې نه دي پلي شوي».
دغه راز د کندز دکرنې رییس وویل، چې اصلاح شوي تخمونه دې باید دکرنې ریاست سره په همغږې په مناسب وقت کې پر بزګرانو ووېشل شي، ترڅو بزګران ترې په سمه توګه ګټه پورته کړي. هغه همداراز زياته کړه، چې پروژې بايد ددې ولایت په هغو برخوکې پلي شي، چې له طبیعي پېښو څخه ډېر زیانمن شوي وي.
په همدې حال کې دملګرو ملتونو د خوړو او کرنې ادارې د شمال ختیځ زون مسوول وویل، چې د کندز دکرنې ریاست سره په همغږۍ خپلې پروژې او برنامې پلي کوي او ډاډ یې ورکړ چې، د (FAO) اداره د اړتیا پر اساس د طبیعي پېښو زیانمنو او هغو ولسوالیو ته چې په تېرو کلونو کې له پروژو څخه محرومه شوې ول لومړیتوب ورکوي او پراختیایي پروژې په کې پلي کوي.