د اصلاح شویو بذري تخمونو د مشورتي بورډ غونډه دائره شوه
۳۱غبرګولی ۱۴۰۱ ه.ش
۲۲ ذوالقعده ۱۴۴۳ ه.ق
دکرنې، اوبولګولو او مالدارۍ وزارت مسلکي مرستیال مولوی صدر اعظم په مشرۍ د اصلاح شویو بذري تخمونو د مشورتي بورډ غونډه دائره شوه.
په دې غونډه کې، چې دکرنې وزارت د کرنې او مالدارۍ معینیت د غونډو په تالار کې په لاره اچول شوې وه په کې د څېړنو لوی رییس، د احصایي رییس، د بذري تخمونو تولید د شرکت رییس، د تخم د تولیدوونکو ټولنو غړو او د ملګرو ملتونو د خوړو او کرنې ادارې «FAO»استازی ګډون درولود او د اصلاح شويو بذري تخمونو په هکله خپل نظرونه شریک کړل.
په غونډه کې دکرنې وزارت مسلکي مرستیال وویل: «د خوښۍ ځای دی، چې په دې غونډه کې ګډون کوم، د بزګرانو د ژوند ښه کولو، د کرکېلي وضعیت ښه کولو او په ټوله کې ټول هېواد لپاره د باکیفیته تخمونو تولید او وېشل مهمه خبره ده، له شک پرته چې په دې برخه کې د نظرونو شریکول او په دې برخه کې هلې ځلې مثبتې پایلې لري، لوی خدای ج په هغو خلکو خپل نعمتونه ډېروي، چې نیک اعمال ترسره کوي او د خلکو د ژوند ښه کولو په پار کار کوي».
غونډه د د غنمو د تولید او بیې ټاکنې په پار د مشورو او نظرونو په شریکولو سره پای ته ورسېد.
