هلمند کې کروندګور لپاره د عملي او نظري زده کړو په موخه ننداریزې کروندې جوړېږي

۱۴ چنګاښ ۱۴۰۰
د هلمند ولایت د کرنې، اوبولګولو او مالدارۍ ریاست چارواکي وایي، چې د فني او مسلکي کارکونکو پر مټ هڅې کوي تر څو د نباتي ناروغیو او افتونو کنټرول پر وخت سره وکړي.
یاد ریاست وایي، چې ددې ولایت بزګرو ته د نباتي ناروغیو او افتونو مخنیوي د عملي او نظري زده کړو په پار اته ننداریزې کروندې جوړوي.
د هلمند دکرنې رییس زلمی الکو وایي، چې په دې ولایت کې د نباتي ناروغیو هر اړخیز مخنیوی (IPM) په موخه چې صنعتي نباتات، سابه او مېوې په کې شامل دي اته ننداریزې کروندې جوړېږي.
په دغو ننداریزې کروندو کې بزګرانو ته د شته ناروغیو د مخنیوي او کنټرول په پار لازمې لارښوونې، میخانیکي او کیمیاوي لارې چارې او ترڅنګ  یې د ناروغیو د مدیریت او د کیمیاوي درملو زیانونه هم بزګرانو ته ښودل کېږي.
دیادې پروسې له لارې به بزګر وتوانیږي ترڅو په اسانۍ سره مخکې تر دې، چې نباتي ناروغۍ او افتونه یې پر کښتونو حمله وکړي مخه یې ونیسي، چې په دې سره به دبزګرو د صنعتي نباتاتو، سبو او مېوو کمیت او کیفیت ښه او لوړ حاصلات به ترلاسه کړي.