زابل کې د ۶۰ عصري ممیزخونو رغنیزې چارې پیل شوې

٦ چنګاښ ۱۴۰۰
د زابل د کرنې، اوبولګولو او مالدارۍ ریاست وایي، چې ددې ولایت د بڼوالو د ملاتړ او د انګورو محصولاتو د خوندي کولو په پار یې د ۶۰ عصري ممیزخونو رغنیزې چارې پیل کړي دي، چې په درې میاشتو کې یې رغنیزې چارې بشپړېږي.
د زابل د کرنې، اوبولګولو او مالدارۍ ریاست چارواکي وایي، چې زابل هر کال سلګونه ټنه انګور توليدوی، پر دې سربېره چې تازه انګور خرڅوي، د انګورو د وچولو او ممیزو لپاره هم عصري ممیز خونو ته اړتيا لري، چې دغه اړتيا اوس د کرنې وزارت له خوا پوره کېږي.
یاد ممیزخونې په دې ولایت کې د ممیزخونو د صنعت د ترویج، د بڼوالو د اقتصاد لوړولو او د انګورو بڼونو د محصولاتو د ارزښت لوړولو په پار په معیاري او اسټنډرد ډول جوړېږي.
دغه ممیز خونې د معیاري او ښه کیفیت لرونکي ممیزو د تولید لامل کېږي او همداراز د انګورو د ضایعاتو مخه نیسي.
زابل کې د کال سلګونه ټنه انګور تولیدېږي او کله نا کله د بڼوالو انګور په ډېره ټېټه بیه پلورل کېږي، دې ته په کتو د عصري ممیز خونو جوړول کولای شي، چې بڼوالو سره مرسته وکړي ترڅو په ښه او عصري بڼه یې انګور په ممیزو بدل شي او له دې لارې ښه عاید ترلاسه کړي.
 د چارواکو په خبره د عصري ممیزخونو په جوړولو سره د بڼوالو عواید ۳۳ سلنه زیاتېږي.
بڼوال وایي کوم ممیز چې، دوی یې په عصري ممیزخونو کې تولیدوی په بازارونو کې یې بیې تر دودیزو هغو چې، دویي په دودیزه بڼه تولیدوی دوه چنده ده.
عصري ممیز خونې د بڼوالو په اقتصادي وده کې رغنده رول لوبوی، ځکه کوم ممیز چې په دغو ممیزخونو کې تولیدیږي له هغو ممیزو څخه چې، په دودیزه بڼه تولیدېږې څوچنده ښه کیفیت لري.
باید وویل شي، چې د وروستیو کلونو په ترڅ کې په هېواد کې د ممیزخونو د صنعت د ترویج، د بڼوالو اقتصادي ودې او د انګورو بڼونو د محصولاتو د ارزښت لوړولو په پار د کرنې وزارت له خوا سلګونه معیاري او اسټنډرډ ممیزخونې جوړ شوي دي او په راتلونکې کې به دې ته ورته نور ممیزخونې هم جوړ شي.