زیرې کرکېلي ته د هلمندي بزګرانو لېوالتیا؛ سږ یې حاصلات ډېریږي

۹ غویی ۱۴۰۰
د هلمند د کرنې، اوبولګولو او مالدارۍ ریاست وایي، چې سږکال په دې ولایت کې د زیرې کروندې زیاتې شوي دي، چې حاصلات به یې هم د نورو کالونو په پرتله زیات شي.
د هلمند دکرنې رییس زلمی الکو وایي، چې په دې وروستیو کالونو کې د نورو با ارزښته نباتاتو ترڅنګ هلمند ولایت کې د زیرې کرنه هم دود شوې، چې د زیرې کروندګر یې له کرکیلې او بازار څخه خوښ دي.
زلمی الکو وویل: « د احصایي او مالوماتو د شمېرو له مخې  سږکال د دغه ولایت په مرکز او ټولو ولسوالیو په شاوخوا 451 هکټآره ځمکه کې زیره کرل شوې ده، چې د اټکل له مخې به دغو کروندو څخه څه باندې ۵۴۰ ټنه حاصل تر لاسه شي.» 
د هلمند زیره د کیفیت له پلوه غوره زیره بلل کېږي، چې په کور د ننه او بهر کې ښه نوم او بازار لري.
زیره، چې په اصل کې یو غرنۍ، صنعتي او طبي بوټی دی، ځانګړي اقلیمي شرایطو ته اړتیا نه لري نو په همدې موخه د هلمند په ډېرو سیمو کې یې کرکېله دود شوې ده.
له زیرې څخه په خوړو او طبابت کې ګټه اخیستل کېږي، چې ډېر مینه وال او پېرېدونکي لري.