پکتیکا کې د نیالګیو کېنولو کمپین پیل شو

۲۷ کب ۱۳۹۹
د پکتیکا د کرنې، اوبولګولو او مالدارۍ ریاست وایي، چې په دې ولایت کې د نیالګیو کېنولو پسرلني کمپین پیل شوی دی.
د پکتیکا د کرنې ریاست د چارواکو په خبره، په پیل شوي، سږني پسرلني کمپین کې به د پکتیکا ولایت په کچه زرګونه نیالګي کېښودل شي او ترڅنګ یې په دې ولایت کې به د مثمرو نیالګیو زر جریبه بڼونه هم جوړ شي.
د پکتیکا د کرنې ریاست چارواکي وایي، چې د کرنې وزارت د « EATS» پروژې له خوا به په دې ولایت کې بزګرانو ته په ۳۰ سلنې بیې د زردالو، بادام، شفتالو، الو، ګیلاس، چهارمغز او نارو نږدې زر جریبه بڼونه جوړ شي.
د پکتیکا ولایت د کرنې ریاست د پکتیکا له اوسیدونکو غواړي، چې په دې کمپین کې ګډون وکړي او د خپل هېواد په سمسورتیا کې برخه واخلي.