د سوېل ختیځ زون د دریو ولایتونو د کرنې یوشمېر کارکوونکو د ملخانو پر وړاندې د مبارزې لارې چارې زده کوي

۲۱ سلواغه ۱۳۹۹
د کرنې وزارت د بوټې ساتنې لوی ریاست په تخنیکي او د ملګرو ملتونو د خوړو او کرنې ادارې «FAO» په مالي همکارۍ د سوې ختیځ زون د «پکتیا، پکتیکا او خوست» ولایتونو د کرنې سیمه ییزو کارکوونکو د ملخانو کنټرول، سروې او نورو اړینو تخنیکي برخو کې روزل کېږي.
دغه درې ورځنۍ روزنیز پروګرام چې، د پکتیا ولایت د کرنې په ریاست کې په لاره اچول شوې ده، یادو کارکوونکو ته د ملخانو پروړاندې د مبارزې تخنیکي لارې چارې، سروې او نورو تخنیکي برخو کې نظري او عملي زده کړې ورکول کېږي.
ددې روزنیز پروګرام په پیل غونډه کې، د پکتیا د کرنې رییس محمدالدین مومند وویل، چې د صحرايي ملخانو ډېرښت طبیعت ننګوي، فصلونه زيانمنوي او چاپېريال له ګډوډی سره مخ کوي. ښاغلی مومند صحرايي ملخانو سره مبارزه اړينه وګڼله او له ګډونوالو يې وغوښتل چې تر لاسه شوې تجربې او زده کړې له بزګرانو سره هم شريکې کړي.
په همدې حال کې، د بوټې ساتنې سرپرست رییس میرجان همت په خپلو خبرو کې وویل، چې سږکال يې د هېواد په سرحدي ولسواليو کې په زرګونه هکتاره ځمکې د صحرايي ملخان څخه پاکې کړي، او د کنترول یادې کړنې به په راتلونکي کې هم دوام ولري.
یاد روزنیز پروګرام په راتلونکې کې ملخانو سره د ښې مبارزې په موخه په لاره اچول شوې ده.