شواک کې پر ۷۰۰ وچکالۍ ځپلو او اړمنو کورنیو خوراکي غنم ووېشل شو
۲۷ غبرګولی ۱۳۹۸
د پکتیا دکرنې، اوبولګولو او مالدارۍ ریاست وایي، چې ددې ولایت د شواک ولسوالۍ پر ۷۰۰ وچکالۍ ځپلو او اړمنو کورنیو خوراکي غنم وېشلي دي.
په هغه غونډه کې، چې پر اړمنو کورنیو د غنمود وېش په موخه جوړه شوې وه د پکتیا مرستیال والي عبدالولي «سهي»، د پکتیا د کرنې رییس محمدالدین مومند، ددې ولایت د طبیعي پېښو پر وړاندې د مبارزې رییس او یوشمېر سیمه ییزو چارواکو شتون درلود.
د پکتیا د کرنې رییس محمدالدین مومند وویل، چې دغه غنم د اړمنو کورنیو تر سروې او پېژندې وروسته پر ۷۰۰ وچکالۍ ځپلو او اړمنو کورنیو وېشل شوي دي.
دغه غنم د کرنې، اوبولګولو اومالدارۍ وزارت تر هلو ځلو وروسته چمتو او وچکالۍ سره د مبارزې په پار پر وچکالۍ ځپلو خلکو وېشل شوي دي.
باید وویل شي، چې تر دې مخکې هم د کرنې، اوبولګولو او مالدارۍ وزارت له خوا د پکتیا ولایت پر وچکالۍ ځپلو او اړمنو کورنیو خوراکي غنم وېشل شوي دي.
