ترینکوټ کې د ښورنګ د اوبولګولو کانال او استنادي دیوال د رغولو چارې پیل شوې
۲۷ غبرګولی ۱۳۹۸
د ارزګان د کرنې اوبولګولو او مالدارۍ ریاست له خوا ددې ولایت په مرکز ترینکوټ ښار کې د ښورنګ د اوبولګولو کانال او استنادي دیوال د رغولو چارې پیل شوي دي.
د ارزګان د کرنې ریاست چارواکي وایي، دغه کانال چې ټولیز اوږدوالی یي درې زره او ۳۲۰ مترو ته رسیږي ډېر شمېر کرنیزې ځمکې خړوبوي. ددې کانال ترڅنګ په دې سیمه کې د یوه استنادي دیوال د جوړولو چارې هم پیل شوي دي. دغه استنادي دیوال چې ټولیز اوږدوالی یې شپږ زره او ۱۲۰ متره ده نن یې د جوړولو چاري په رسمي توګه پیل شو.
ددې پروژې ټولیز لګښټ ۱۳میلیونه، ۳۰ زره او ۶۸۰ افغانۍ ده.
د یاد استنادي دیوال او د اوبولګولو کانال د جوړولو په ترڅ کې به د سیمې یو شمېر اوسیدونکو ته د کار زمینه هم برابره شي. د یادونې وړ ده، چې د دې استنادي دیوال او کانال په جوړولو سره به د اوبو په ضایعاتو کې د پام وړ کمښت راشي او د کروندګرو د حاصلاتو د لوړېدو لامل هم کیږي. یاد کانال ۴۰ سلنه د اوبو له ضایعاتو څخه مخنیوی کوی او همداراز د هغو ځمکو کرنیز محصولات به هم ۲۰ سلنه لوړ شي چې، د دې کانال له لارې خړوبیږي.
