د خوشتیپې کانال د تخنیکي مطالعې راپور بشپړېدو په پار غونډه وشوه

۱۸ مرغومې ۱۳۹۹
د کرنې اوبولګولو او مالدارۍ وزارت د اوبولګولو او طبیعي سرچینو مرستیال حشمت الله غفوري په مشری، د خوشتیپې کانال د تخنیکي مطالعې (مقایسوي هایډرولوژیکي مطالعاتو) د بشپړېدو او د اوبو سربند په موخه غونډه او د خوشتیپې ملي پروژې د سرچینو پیدا کولو لپاره له تخنیکي ټیم سره خبرې وشوې.
په غونډه کې لومړی د (AACS) تخنیکي ټیم د سر بند په اړه تخنیکي راپور د کرنې وزارت تخنيکي ټيم سره شریکه کړه او ترڅنګ يې د کرنې وزارت اړوند تخنیکي ټیم هم د پروژې په اړه خپل تخنیکي نظریات له (AACS) سره شریک کړل.
په همدې حال کې د کرنې وزارت د اوبولګولو او طبیعي سرچینو مرستیال حشمت الله غفوري د AACS تخنیکي ټیم ته لارښونه وکړه، چې د اوبو ظرفیت ته په کتو د کلدار او خوشتیپې سیمې څخه یو انتخاب او نهايي شي او د سربند رغولو تخنیکي راپور د روان زېږديز کال د جنوري تر ۱۵مې نیټې بشپړ او کرنې وزارت ته وسپاري، تر څو د راپور له بشپړېدو وروسته يې پاتې چارې پیل شي.
بايد وويل شي، چې د خوشتيپې د اوبولګولو د ملي پروژې اوبه د امو له سینده تامنیږي، چې د کندز له ولایت څخه پیل او د فاریاب ولایت کې پای ته رسیږي. ددې پروژې په پلي کولو سره څه باندې ۵۰۰ زره هکټاره نوي ځمکې د خړوبولو تر پوښښ لاندې راځي. د یادې پروژې د لومړي پړاو څېړنې بشپړ شوي دي او د ۲۰۲۱ ام کال په لړ کې به يې د رغولو چارې پیل شي.