هلمند کې د چرګوړو ایستلو هیچري په فعالیت پیل وکړ
د هلمند ولایت د کرنې، اوبولګولو او مالدارۍ ریاست چارواکي وایې، په یاد ولایت کې له څلورکلن ځنډ وروسته د چرګوړو ایستلو هیچري بياځلې په فعالیت پیل وکړ. د هلمند د کرنې ریاست چارواکو زیاته کړه، چې د چرګوړو ایستلو دغه ستر فارم د هیواد په کچه یو له پرمختللو فارمونو څخه دی، چې مکمل وسایل او ماشینونه لري.
د هلمند ولایت د کرنې، اوبولګولو او مالدارۍ ریاست رییس زلمی الکو وایې، د هلمند ولایت د چرګوړو ایستلو فارم د یوشتو ورځو په جریان کې د یولک او ۲۵ زره چرګوړو د ایستلو وړتیا لري او په هرساعت کي د ۴ ټنه د چرګانو د خوراکې توکو د چمتو کولو وړتیا لري.
یاده هیچرې له څلورکلن ځنډ وروسته دوباره د کرنې اوبولګولو او مالداری وزارت په هڅو د خصوصي سکټور په چوکاټ کې په فعالیت وکړ، چې تر اوسه یې د یوې اونۍ په دوران کې پنځه شپیته زره او ۲۸۰ چرګوړې ایستلې دي.
د ښاغلې الکو په وینا، د هلمند ولایت د کرنې، اوبولګولو او مالدارۍ ریاست هڅه کوي ترڅو د کورنیو تولیداتو کچه د وارید کونکو توکو پر وړاندي لوړه کړي او تر څنګ یی د هلمند خلکو ته د کار زمینه برابره کړي.
