کونړ کې پر ۱۰۰ بې وزله کورنیو د هګیو چرګان او اړونده توکي ووېشل شول

۲ مرغومې ۱۳۹۹
د کرنې، اوبولګولو او مالدارۍ وزارت په هېواد کې د چرګانو روزنې د ودې او د بېوزله کورنیو د اقتصادي ودې په پار داځل د کونړ ولایت د اسمار او پیچ درې په ولسوالیو کې د ځنګلولۍ د ۲۰ ټولنو پر ۱۰۰ بې وزله کورنیو د هګیو چرګان او د چرګانو روزنې اړونده توکي وېشلي دي.
د کونړ ولایت د کرنې، اوبولګولو او مالدارۍ ریاست وایي: « د کرنې وزارت اړوند د ځمکې او ځنګلونو د تلپاتې مدیریت پروژې (GEF) له خوا د ملګرو ملتونو د خوړو او کرنې ادارې « FAO» په مرسته پر یادو کورنیو درې زره د هګیو چرګان او د چرګانو ۱۵زره کیلو ګرامه خوراکي توکي او د چرګانو روزنې اړونده اړین توکي وېشل شوي دي.»
د کونړ د کرنې، اوبولګولو او مالدارۍ ریاست چارواکي وايي، چې د دغو ۱۰۰ بېوزله کورنیو د اقتصادي پیاوړتیا په پار پر هرې کورنۍ ۳۰ د هګیو چرګان، د چرګانو ۱۵۰ کیلو ګرامه خوراکي توکي او د چرګانو د روزنې اړوند نور اړین توکي وېشل شوي دي.
د کونړ د کرنې ریاست د چارواکو په خبره ددې مرستې موخه د چرګانو د روزنې صنعت ته پراختیا ورکول، مېرمنو ته په کور د ننه د کار زمینه برابرول او د دوی د اقتصادي پیاوړتیا ترڅنګ، د ځنګلونو د پرې کېدو مخنیوی او د ځنګلولۍ د ټولنو پیاوړتیا ده، ترڅو ملي سرچینې خوندي شي.
بلخوا د خوړو نړیوال پروګرام «WFP» په مرسته د کونړ ولایت د اسدآباد، سرګاڼو، نرنګ او خاص کونړ په ولسوالیو کې پر ۳۵۰ بزګرانو کندوان ووېشل شول.
د کونړ د کرنې ریاست وایي، چې دغه وېشل شوي کندوان هر یوه یې د ۵۰۰ کیلو ګرامه غلو دانو د ساتنې وړتیا لري، چې د غلودانو له حاصل ټولولو وروسته د ضایعاتو د مخنیوي په پار وېشل شوي دي.