۲۵ وږی ۱۳۹۹

پارون د نورستان ولایت مرکز دی، چې ډېری اوسیدونکي یې په کرنه، بڼوالۍ او مالدارۍ بوخت دي. د کرنې، اوبولګولو او مالدارۍ وزارت ددې ولایت د مرکز پارون او نورو سیمو د بزګرانو دملاتړ په پار د کرنیزو محصولاتو مدیریت د برنامې له لارې د ۱۴ نویو پروژو چارې پیل کړي دي، چې رغنیزې چارې یې ۷۰ سلنه بشپړ شوي او پاتې چارې به یې هم ډېر ژر بشپړ او ګټې اخیستنې ته به وسپارل شي.

د نورستان د کرنې، اوبولګولو او مالدارۍ رییس عبدالوهاب نسیمي وایي: «د نورستان د بزګرانو لپاره د کچالو ۱۴ زېرمتونونه جوړولو چې رغنیزې چاري یې ۷۰ سلنه بشپړ شوي دي، دغه زېرمتونونه هر یوه یې د څه باندې ۱۵ ټنه کچالو د زېرمه کولو وړتیا لري، چې په ټولیزه توګه به ددې ولایت ۲۲۰ مټریک ټنه کچالو په کې خوندي شي.»

د ښاغلي نسیمي په خبره دغه پروژې ددې ولایت د هغو بزګرانو د ملاتړ په پار پلي کیږي، چې د کچالو کرکېله کوي. د نورستان په ولایت کې تر ډېره د کچالو کرکېله کیږي، په همدې موخه په دې ولایت کې بزګرانو لپاره د کچالو زېرمتونونه جوړیږي، ترڅو د دوی محصولات خوندي او عواید یې ډېر شي.

د نورستان د کرنې رییس وویل، چې د زېرمتونونو په جوړېدو سره به ددې ولایت کرنیز محصولات د خوساکېدو او ضایع کېدو څخه وژغورل شي.

د نورستان ولایت بزګران د یادو پروژو له پلي کېدو خوښ دي او هرکلۍ یې کوي، د دوی په خبره په تېرو کلونو کې د زېرمتونونو د نشتون له وجې د دوی د کچالو محصولات خوساکېدل او یا په ډېره ټیټه بیه پلورل کېدل. دوی اوس خوښ دي، چې د دوی دمحصولاتو لپاره سړې خونې جوړیږي او هیله مند دي، چې ددغو سړوخونو پرمټ به ددوی محصولات خوندي او په مناسب وقت او مناسبه بیه به وپلورل شي.

د کرنیزو محصولاتو د مدیریت طرحه، د بڼوالو او بزګرانو اړتیاوو ته په کتو، د دوی لپاره کرنیز بنسټونه جوړوي. بزګران او بڼوال د دغو بنسټونو د جوړولو یوازې ۱۰ سلنه لګښت ورکوي او ۹۰ سلنه نور لګښت یې د کرنې وزارت له خوا ورکول کیږي.