لوګر کې د یوې سترې او معیاري سړې خونې د جوړولو چارې پیل شوې

۳۱ وری ۱۳۹۹
د لوګر په ولایت کې د یوې سترې او معیاري سړې خونې د جوړولو چارې پیل شوې. دغه سړه خونه چې جوړولو یې ۱۸۰ میلیونه افغانۍ لګښت لري، د بنسټ دبره یې د لوګر والي محمد انورخان اسحاق زی او یو شمېر نورو چارواکو له خوا کېښودل شوه.
د لوګر ولایت د کرنې، اوبولګولو او مالدارۍ رییس عبدالله تسل وایي، چې ددې سړې خونې د جوړولو چارې د کامپلیکس په بڼه، نن د لوګر د پادخواب شانې په دښته کې پیل شو. ددې سړې خونې د جوړولو چارې د ۱۸۰ میلیونه افغانیو په لګښت د ملي پراختیا شرکت له خوا پرمخ وړ کیږي. دغه سړه خونه په لمریز برېښنا هم سمبالیږي.
دغه سړه خونه یو معیاري او عصري سړه خونه ده، چې په یو نیم جریبه ځمکه کې جوړیږي. ټاکل شوې، چې دغه سړه خونه د یوزر او ۵۰۰ مټریک ټنه مېوو او سبو د ساتنې وړتیا ولري.
دغه سړه خونه د کرنې وزارت له خوا ډیزاین او د جوړولو چاري یې د ملي پراختیا شرکت له خوا پر مخ وړل کیږي.
ددې سړې خونې د جوړولو په لړ کې، چې کابو دوه کاله نیسي، څه باندې ۱۰۰ کسانوته به د کار زمینه هم برابره شي. دغه راز تر بشپړېدو وروسته به ۳۰ کسانو ته د تلپاتې دندې زمینه هم برابره کړي.
مڼه، انګور، زردالو، بادرنګ، رومي بانجان، کچالو او پیاز د لوګر ولایت تر ټولو عمده سابه اومېوې دي، چې ټاکل شوې په دې سړه خونه کې به وساتل شي او بیا بسته بندي او پروسس شي.
د سبو او مېوو عمر زیاتول، د دغو محصولاتو د بیو کنټرول، د بزګرانو اقتصادي وده او په بېلابېلو موسمونو کې د مېوو او سبو د وارداتو په کچه کې کموالی راوستل ددې سړې خونې ګټې دي.
باید وویل شي، چې تر دې وړاندې هم د کاپیسا، پروان، میدان وردګ، غزني، فاریاب او تخار په ولایتونو کې د ورته سړوخونو د جوړولو چارې پیل شوې وې او ټاکل شوې ده، چې په یوشمېر نورو ولایتونو کې هم ورته سړې خونې جوړې شي.