د موسی کلا بند او زمینداور د کانالونو تخنیکي سروې پیل شو

۱۷ وری ۱۳۹۹
د هلمند په ولایت کې د  موسی کلا بند او زمینداور د کانالونو تخنیکي سروې پیل شوي دي.
د هلمند دکرنې، اوبولګولو او مالدارۍ ریاست چارواکي وایي، چې په دې ولایت کې د دوو بنسټیزو پروژو «د موسی کلا بند او زمینداور د کانالونو تخنیکي سروې» پیل شوي دي.
د موسی کلابند په رغولو سره به ددې ولایت اړوند د موسی کلا او نوزاد ولسوالی  نږدې ۱۲زره هکتاره ځمکه ترخړوبولو لاندې راشي او همدارنګه یاد بند به د ۴۰۰متر مکعب اوبو د زېرمه  کولو وړتیا ولري، چې د ۵۵ څخه تر ۶۰ متره پورې لوړوالی او  ۱.۸ کیلو متره به یې سور وي.
همدارنګه زمینداور کې به دوه کانالونه چې یو به یې ۱۰۳۰ متره لوړوالی ولري او اوبه به په کې د پمپونو له لارې خیژي اوبیابه د کرنیزو ځمکو خړوبولو په برخه کې ورڅخه ګټه اخیستل کیږي. 
په یاده سیمه کې یو بل کانال چې ۱۰۸۰ متره د اصلي نقطې څخه لوړوالی لري د کجکي د پارچاوي څخه به مستقیما اوبه ورکول کیږي، چې له دواړو کانالونو څخه به نږدې ۱۶ زره هکتاره ځمکه ترخړوبولو لاندې شي او هم به د تر ځمکې لاندې  ۳۶۰ کاریزونو په اوبو باندې  به مثبت اغېز ولري.
د یادو پروژو تخنیکي سروې به د درې میاشتو په ترڅ کې بشپړ او له ډیزاین وروسته به یې عملي چارې پیل شي.