پکتیکا کې د نیالګیو اېښودو کمپاین د«یو نیال د ځان او یو نیال د سولې لپاره» تر شعار لاندې پیل شو
۲۲ کب ۱۳۹۸
د پکتیکا د کرنې، ابولګولو او مالدارۍ ریاست له خوا د کب شلمه، د نیالګیو اېښودو ملي ورځ په شاندارو مراسمو سره ولمانځل شوه. ددغو مراسمو په ترڅ کې، چې دکب په شلمه نېټه په لاره اچول شوې وه د پکتيکا والي ډاکټر مجيب الرحمن څمکني، د کرنې رییس، مدنې ټولنو، قومي مشرانو، ژورنالستانو او ځوانانو له خوا نیالګي کېنول شول او د نیالګیو اېښودو کمپاین هم د«یو نیال د ځان او یو نیال د سولې لپاره» تر شعار لاندې پیل شو.
په دې اړه جوړه شوې غونډه کې د پکتيکا والي ډاکټر مجيب الرحمن څمکنی، د پکتیکا ولایت له اوسیدونکو غوښتنه وکړه، چې هر یوه یې یوه نیالګی د ځان او یو نیال د سولې لپاره کېنوي، ترڅو هېواد مو زرغون او د سولې، ورورۍ او اخوت پیلامه شي.
ښاغلي څمکنی وویل، څومره چې د نيالګيو کېنول ورته مهم دي په هماغه اندازه یې ساتنه او پالنه هم ورته مهمه ده او اړوند ادارو ته یې جدي سپارښتنه وکړه، چې د نيالګيو د ساتنې او پالنې ته جدي پام وکړي.
په همدې حال کې د پکتیکا دکرنې رییس وویل، چې ددې کمپاین په لړ کې به د پکتیکا په مرکز او ولسوالیو کې نږدې ۲۰۰ زره مېوه لرونکي او بې مېوې نیالګي کېنول شي.
د کرنې رییس دغه راز وویل، چې سږکال به ددې ادارې له خوا د پکتیکا په مرکز او ددې ولایت په ولسوالیو کې ۱۶۰۰ جریبه د مېوو نوي سوداګریز بڼونه هم جوړ شي او ترڅنګ یې ددې لایت دسمسور تیا په پار ۱۵ زره غیر مثمر نیالګي هم کېنول کیږي.
د پکتیکا ولایت د کرنې ریاست ددې ولایت له خلکو غواړي، چې په دې کمپاین کې ونډه واخلي او د ونو او نیالګیو ساتنې او څارنې ته ځانګړې پاملرنه وکړي.
