د ننګرهار بټي کوټ کې د اوبو ایستلو کانال د پاکولو چارې پیل شوې

۱۲ لړم ۱۴۰۵ هـ.ش
۲۲ جُمَادَى الأول ۱۴۴۸ هـ.ق
د ننګرهار ولایت د بټي کوټ ولسوالی د غازي‌آباد د ملایانو کلي د اوبو ایستلو کانال (زابر) د پاکولو پروژې چارې د ننګرهار دکرنې ریاست د قدرتي زېرمو امر قاري کاهون عبدالرحمن اتل، د ولسوالی د استازو، قومي مشرانو او د سیمې د اوسېدونکو په حضور کې رسماً پیل شوې.
د ننګرهار د کرنې ریاست د قدرتي زېرمو امر قاري کاهون عبدالرحمن اتل وویل، چې دغه پروژه د کرنې، اوبولګولو او مالدارۍ وزارت په ۸۰۰ زره افغانیو مالي لګښت او د ننګرهار کرنې ریاست په تخنیکي همکارۍ، له یوه خصوصي شرکت سره د تړون له مخې پلې کېږي.
نوموړي زیاته کړه، چې د یاد کانال په پاکولو سره به له ۲۰۰۰ جریبو څخه زیاته کرنیزه ځمکه د ولاړو اوبو له زیان څخه وژغورل شي او د سلګونو جریبو ځمکو ترڅنګ به په دغو سیمو کې د دوه‌فصله کرنې او کښت زمینه هم برابره شي.
د یاد کانال اوږدوالی ۲۵۰۰ متره او سور یې ۷ متره دی، چې د پاکولو چارې به یې د کرنیزو ځمکو په بیارغونه، د کرنیزو تولیداتو او حاصلاتو په زیاتوالي او د سیمې د خلکو د اقتصادي ودې په برخه کې مهم رول ولوبوي. همدارنګه، د پروژې د پلي کېدو پر مهال به ۱۵۰ سیمه‌ییزو اوسېدونکو ته د کار زمینه برابره شي.